تاند: ( دوشنبه ، د دلوې یوولسمه) د پاکستان د ملي امنيت سلاکار ډاکټر معيد يوسف پرون په کابل د خپل سفر په ترڅ کې د پاکستان په لګښت د جوړ شوی محمد علي جناح روغتون لیدو ته لاړ.
په کابل کې د پاکستان سفير منصور احمد خان ويلي، چې نوموړي د دې لیدنې پر مهال د روغتون د چارواکو له لوري مطرح شوې ستونزې اوريدلي او د حل ډاډ یې ورکړی.
دغه روغتون څو کاله مخکې د کابل ښار په لویدیځ کې جوړ شوی و.
پاکستاني سفير په ورته وخت کې ويلي، چې د هېواد د ملي امنيت د سلاکار په مشرۍ یې کابل ته راغلی پلاوی پرون بېرته پاکستان ته ستون شوی دی.
طالبانو د نوموړي د سفر په اړه ډېر جزییات نه دي رسنيز کړي.
ځینې سرچینې وايي، چې دغه سفر تر ډېره امنيتي او سياسي اړخ درلود، خو طالبانو او پاکستاني لوري د اقتصادي او بشري همکاريو په نوم تمام کړ.
د سرچينو په حواله په دې سفر کې د ډیورنډ کرښې په اوږدو کې د اغزن تار لګول او په افغانستان کې د پاکستان د تحريک طالبان پر ضد د عملياتو ترسره کیدل د بحث عمده ټکي وو.