تاند: ( چار شنبه، د دلوې شپږمه) د افغانستان د ملي نهضت ګوند مشر سید اسحاق ګیلاني، چې د ناروې په پلازمېنه اوسلو کې یې د یو شمېر افغان څېرو په ملتيا د طالبانو د بهرنيو چارو وزير مولوي امیر خان متقي په مشرۍ د دوی له یوه لوړ پوړي پلاوي سره مذاکراتي ناسته لرله، د دغه مذاکراتو په اړه ځینې جزییات رسنيز کړل.
ګیلاني دا ناسته به له دې کبله مثبته وګڼله، چې د طالبانو له واکمنیدو وروسته، طالب چارواکو په لومړي ځل له نورو افغانانو سره وليدل او ناسته یې د يوې مثبتې اعلامیې په خپریدو سره ترسره شوه.
سيد اسحاق ګيلاني په دې مرکه کې دا هم وويل، چې دوی دې ناستې ته د ناروې هېواد په بلنه غوښتل شوي وو.
ګیلاني رد کړه، چې دوی د طالبانو د پلویانو په توګه دې ناستې ته بلل شوي وو.
د اسحاق ګيلاني په وينا، په کابل کې ژوند کول په دې مانا نه دي، چې هلته ژوند کوونکي به ټول د طالبانو پلویان او د دوی د « اسلامي امارت» غوښتونکي دي.
دغه افغان سياستوال ټينګار وکړ، چې په افغانستان کې بايد ټول ګډونه نظام رامنځته شي.
د ده په خبره، دوی د يو شمېر افغان شخصیتونو په توګه طالب لوري ته د« ټول ګډونه نظام» د جوړېدو په اړه خپلې غوښتنې او طرحې هم وړاندې کړي.
اسحاق ګيلاني زياتوي، چې طالب پلاوي د دغې دوی د ورسپارلو غوښتنو په اړه په کابل کې د خپلمنځیو مشورو ډاډ ورکړی.
طالبانو د اسحاق ګيلاني د څرګندونو او دغه راز د اوسلو ناستې په اړه له عمومي معلوماتو وراخوا نور جزییات نه دي ورکړي.