تاند: ( چار شنبه، د دلوې شپږمه) د افغانستان پخواني ولسمشر حامد کرزي ته یوه نیږدې سرچينې، چې نه غواړي نوم یې خپور شي، د نوموړي په هڅو په ناروې کې د طالبانو او يو شمېر افغان سیاسي څېرو د ناستې د ترسره کيدو خبر ورکوي.
سرچينه زياتوي، چې د دغې ناستې د تنظیم لپاره په افغانستان کې ډېرې هڅې حامد کرزي او له هېواده بهر هڅې د افغانستان لپاره د امريکا مخکيني استازي زلمي خليلزاد سمبالولې.
ويل شوي، چې له افغانستان څخه په دې ناسته کې د ګډون کوونکو لیست هم تر ډېره د ښاغلي کرزي د دفتر له لوري تنظیم شوی و، چې طالب چارواکو پوره همغږي ورسره لرله.
د حامد کرزي مطبوعاتي دفتر څه موده مخکې تایید کړه، چې د ناروې سفير افغانستان ته د سفر پر مهال له نوموړي سره لیدلي.
د دې ترڅنګ د طالبانو د بهرنيو چارو وزير په اوسلو کې د افغانستان لپاره د ملګرو ملتونو له پخواني ځانګړي استازي کای ایډې سره هم لیدلي.
کای ایډي د حامد کرزي له نيږدې شخصي ملګرو څخه و او ويل کېږي، چې د هغه په غوښتنه یې متقي سره لیدلي او د طالبانو د حکومت په ګټه یې دیپلوماتیکې او رسنيزې هڅې پيل کړي.
طالبانو او د حامد کرزي دفتر د دغو څرګندونو په اړه څه نه دي ويلي.
حامد کرزي په ناروې کې له یو شمېر افغان څېرو سره د طالبانو د لیدنې او ګډې اعلاميې هرکلی کړی دی.
په دې مذاکراتو کې د حامد کرزي د دفتر رئیس عبدالکریم خرم هم ګډون درلود او ورسره تړلو رسنيو د ناستې په ګټه ډېر تبلیغات کول.
د ناستې منتقدینو او له هغې ډلې هزاره مشر حاجي محمد محقق دې ته په پام سره، چې په ياده غونډه کې تر ډېره طالب پلوو څېرو د افغان شخصیتونو په توګه ګډون کړی و ويلي، چې په ناروې کې « طالبانو» له « طالبانو» سره غونډه کړې ده.
یادې څرګندونې په داسې حال کې دي، چې یو شمېر خلک حامد کرزی او ډاکټر عبدالله د طالبانو له لوري په کابل کې « نظر بند» شوي ګڼلي دي.
تېره اونۍ یو شمېر رسنیو داسې راپورونه خپاره کړل، چې د امريکا پخوانی استازی زلمی خلیلزاد دوحې ته تللی او له قطري څخه یې مرسته غوښتې، چې طالبان له یو شمېر افغان لوریو سره د ګډ نظام په اړه د مذاکراتو بیا پیلیدو ته وهڅوي.
زه ګمان نکوم چې دوه ناکامه لغړیان د دومره سیاسی اړکي ولري چې هم یې ناروې مني او هم یې نورره نړۍ ، طالبان اوس یو منل شوی حقیقت دی نو نړۍ وال مجبوره دي چې ددوی سره خبرې شروع کړي او داځکه چې د افغانستان د اولس غمیزه خو ددوی د باغ مڼې دي ! دا ظالمان راغله مونږ یې مړه کړو خو یوه فابریکه هم په دا شلو تیرو کلنو کې جوړه نکړه ! او اخیرته چې وتل ټول خپل بړیڅي یې هم له ځان سر واخیستل او لا اخلي يې ، هیواد یې تش بې تعلیمه پریښوود !