تاند ( شنبه د قوس ۳مه) په پاکستان کې د پولیو یا ګوزڼ ناروغۍ مخنیوي پروګرام وايي چې د خیبر پښتونخوا په ډېره اسماعیل خان کې د ګوزڼ دوه نوې پېښې ثبت شوې،چې ورسره سږ کال په دې هېواد کې د پولیو د مثبتو پېښو شمېر ۵۲ ته لوړ شو.
یادې ادارې پرون جمعه ناوخته په خپله ویب پاڼه په یوه خبرپاڼه کې ويلي، چې د روغتیا ملي ادارې د خيبر پښتونخوا په ډېره اسماعيل سیمه کې د دوو ماشومانو په وینه کې د پولیو وایرس تایید کړی دی.
د پولیو مخنیوي پروګرام وايي چې روان کال په بلوچستان کې د پولیو ۲۴، په سند کې ۱۳، په خیبر پښتونخوا کې ۱۳ او په پنجاب او اسلام اباد کې یوه، یوه پېښه ثبت شوې ده.
پاکستان کې سږ کال د ګوزڼ پېښې د ۲۰۲۳ز کال پرتله په بېساري ډول زیاتې شوې دي.
تېر کال هم په پاکستان کې د ګوزڼ شپږ پېښې ثبت شوې وې چې ورڅخه یې څلور ماشومان د خیبر پښتونخوا او دوه د سند اوسېدونکي وو.
وروستۍ ناامنۍ، وسلوال بریدونه او ګواښونه د پولیو د واکسین کمپاینونو پر وړاندې ستر خنډونه یادېږي چې له امله یې ورځ نه بلې ته د ګوزڼ پېښې زیاتېږي.
پاکستان او افغانستان د نړۍ یوازیني هېوادونه دي چې پکې لا هم د پولیو وایرس موجود دی.
په افغانستان کې سږ کال تر اوسه ۲۳ ماشومان ګوزڼ وهلي دي چې زياتره يې د هلمند او کندهار ولایتونو اوسېدونکي دي.