تاند: ( چار شنبه، د دلوې شپږمه) ټاکل شوې، چې د ملګرو ملتونو امنیت شورا نن د افغانستان د وضعیت په اړه ځانګړې غونډه وکړي.
ويل شوي، چې د دې غونډې مشري د ناروې صدراعظم کوي او سرمنشي آنتونيو ګوترش کوي او په افغانستان کې د ملګرو ملتونو ځانګړې استازې مېرمن ديبورا لاينز د افغانستان په اړه پکې د افغانستان د وضعيت په خپل راپورونه وړاندې کوي.
دا غونډه په داسې مهال کیږي، چې روانه اونۍ د طالبانو د بهرنيو چارو وزير مولوي امیر خان متقي په مشرۍ د دوی يوه لوړپوړي پلاوي ناروې ته سفر درلود.
ياد شوي پلاوي د مختلفو اروپايي هېوادونو او دغه راز د امريکا متحده ايالاتو له دیپلوماتانو سره لیدنې او مذاکرات لرل.
تمه کيږي، چې د دې مذاکراتو پایلې به په نننۍ غونډه کې شریکې او د ملګرو ملتونو امنیت شورا ته یې په اړه ځینې وړاندیزونه وشي.
طالبان له یادې ناستې څخه د دوی په ګټه د پریکړو تمه لري، خو لویدیزو دیپلوماتانو روښانه کړې، چې د طالبانو د په رسميت پېژندلو په اړه فکر نه کوي، بلکې مشروط تعامل غواړي ورسره وکړي او ۲۲ میليونه فقر ځپلو افغانانو ته مرستې ورسوي.