تاند:( دوشنبه، د دلوې څلورمه) د طالبانو د حکومت وياند ذبيح الله مجاهد وايي، چې له فرانس پريس خبري اژانس سره د دوی د مخالفانو او معترضانو په اړه د نوموړي خبرې د ځینو مغرضو کړیو لخوا ناسمې تعبیر او ترجمه شوې دي.
ښاغلي مجاهد ويلي: متأسفانه ځینې په اصطلاح رسنۍ د خاصې عقدې له مخې سمه خبره ناسمه تعبیروي، پروپاګند کوي او خلکو ته تشویش اچوي.
طالب وياند نه دي ويلي، چې له يادو خبرو څخه د هغه اصلي منظور څه و؟
پرون د نوموړي په حواله خبر ورکړل شو، چې د خپلو مخالفانو او معترضانو ځپل او بندیانول یې د طالبانو « حق» وباله.
دا په داسې حال کې ده، چې يوازې د موندل شویو ارقامو په اساس تېره اونۍ طالبانو ۵ معترضې ښځې له کورونو ويستي او نادرکه کړي دي.
تېره اونۍ په کابل کې د پاکستان ضد لاریون تنظيمونکی عظيم عظيمي هم طالبانو نیولی او بندي کړی، چې لا يې برخليک نه دی معلوم.