تاند: ( جمعه، د جدي اوولسمه) په دايکندي ولايت کې سیند ته د یوه موټر د غورځیدو او په کندوز ولايت کې د ترافيکي پېښې له امله یو شمېر خلکو ته مرګ ژوبله اوښتې ده.
په دايکندي کې د طالبانو ځايي چارواکو ویلي، چې په ګيزاب ولسوالۍ کې د اتو مساپرو يو فلانکوچ موټر د هلمند سيند ته لویدلی، چې تر اوسه يې د یوې مېرمنې جسد له سیند څخه ويستل شوی دی.
په دې موټر کې ۴ مېرمنې، دوه نارينه او ۲ ماشومان سپاره وو.
یوې بلې سرچینې ویلي، چې په دې پېښه کې ۹ تنه شدید ټپیان شوي او ۴ نور سیند ډوب کړي.
بل لور ته: د کندوز ولايت د خان آباد او علي آباد پر لویې لارې د ترافیکي پېښې له امله لږ تر لږه ۱۰ تنه ټپيان شوي.
د خان آباد د روغتون يوې سرچينې ويلي، چې دا پېښه پرون کابل نه تخار ته د تلونکي یوه بس موټر د انحراف له کبله رامنځته شوې، چې په ټپيانو کې یې ښځې، ماشومان او نارینه شامل دي.
د ژمي له را د بره کيدو سره، د افغانستان له مختلفو سيمو څخه د ترافيکي پېښو د زیاتېدو خبرونه ورکول کېږي.
ويل کيږي، چې د پېښو د زیاتېدو يو مهم دليل په لويو لارو کې د ترافيکو د پرسونل او نورو لازمو تدابيرو نشتوالی دی.
د افغانستان له مختلفو سيمو څخه د ترافيکو پرسونل شکايت کوي، چې طالبانو له څو مياشتو راهيسې معاشونه نه دي ورکړي او له دې کبله يې خپلې دندې پريښي.
طالبان بيا وايي، چې د اکثرو ادارو منسوبینو ته يې معاشونه ورکړي او نورو ته يې ورکړه جريان لري.