تاند: ( چارشنبه، د جدي پینځلسمه) د پښتون ژغورنې غورځنګ رهبر منظور پښتین وايي، چې په افغانستان کې واکمن طالبان او پاکستان د خپلو اړیکو د رسمي کولو کومه اړتيا نه ويني، ځکه پاکستان د طالبانو حکومت په رسمیت نه پیژني.
ښاغلي پښتین په یوه تازه مرکه کې وويل، چې پاکستان له پخوا نه طالبان په کابل کې د بریدونو لپاره حمايه کول او خپلې ګټې یې پکې لیدې.
نوموړي دا هم وويل، چې د طالبانو او پاکستان اړيکې ټولو ته روښانه دي او دوی يې له رسمي اړيکو هم سره پاللی شي، ځکه خو د رسمي اړيکې د رامنځته کولو اړتيا نه ويني.
ښاغلي پښتین په پاکستان کې د پښتون ژغورنې غورځنګ د حق غوښتنې د وروستي لاريون په اړه چې په کراچۍ ښار کې د لسګونو زره کسانو په ګډون تر سره شو، وویل چې دا لاريونونه او مبارزه به دوام ولري.
د پښتون ژغورنې غورځنګ رهبر وويل، چې د پاکستان په زندانونو کې د زرګونو بې سرنوشته بنديانو را خوشې کیدل د دغو لاريونونو او مبارزې اساسي غوښتنه ده.
د يادونې وړ ده، چې د پاکستان د پوځ او ظلمونو پر ضد يې د پښتون ژغورنې غورځنګ د مبارزو پراختيا په نړيواله کچه د ډېرو پښتنو له ملاتړ سره مخ شوی او د نړۍ په مختلفو برخو کې مېشتو پښتنو د دغه غورځنګ په ملاتړ د لاریونونو خبر ورکړی.