تاند: ( چارشنبه، د جدي پینځلسمه) د هېواد د شمالي سالنګونو د ساتنې او څارنې ادارې ويلي، چې د سختو توپانونو او واورې له کبله د سالنګونو لویه لاره د ترافيکو پر مخ تړل شوې ده.
د يادې ادارې مشر عبيدالله عبيد وويل، چې ياده لاره د ترافيکي پېښو د رامنځته کيدو له وېرې تړل شوې ده.
هغه زياتوي، چې په سالنګونو کې تر یو متر پورې واوره وریدلې او لا هم وريږي.
د سالنګونو د ساتنې لپاره د طالبانو له لوري ټاکل شوي دغه مقام زیاته کړې، چې په واورو کې د احتمالي ايسارو کسانو د ژغورنې لپاره يې کارکوونکي لاس په کار شوي دي.
هغه تر دې دمه د واورو له کبله په سالنګونو کې د مرګ ژوبلې خبر نه دی ورکړی.
د افغانستان په يو شمېر مرکزي، جنوبي او نورو ولايتونو کې هم چې غره ییز دي او مواصلاتي ستونزې لري، د وروستيو ورښتونو له امله د لويو لارو د بندېدو خبر ورکړل شوی دی.
په وروستيو ورښتونو او سېلابونو کې د مرګ ژوبلې خبرونه ورکړل شوي، خو ارقام یې تر اوسه نه دي دقيق شوي.
د طالبانو سرپرستې کابینې تېره اونۍ د رييس الوزرا د لومړي مرستيال ملا برادر په مشرۍ يو کميسيون وټاکه، چې د طبيعي پېښو زیانمنو ته رسیدګي وکړي.
دغه کميسيون تر اوسه د خپلو فعاليتونو او زيانمنو سره د مرستو جزییات نه دي خپاره کړي.