تاند: ( پنجشنبه د جدي نهمه) د طالبانو د ریاست الوزراء لومړي مرستیال ملا عبدالغني برادر اخوند د افغانستان د صنعت او معدن خونې له مسؤلانو سره ليدلي.

د ملا برادر دفتر په دې اړه وايي: محترم ملاصاحب د هیواد د اقتصادي پياوړتیا او د بېکارۍ کچې په له منځه وړلو کې د خصوصي سکتور رول مهم وباله او زیاته یې کړه: خصوصي سکتور په ۵ زرو فابریکو کې نږدې یو نیم میلیون کسانو ته د کار زمینه برابره کړې، چې دوی یې د فعالیت ستاینه کوي.

د صنعت او معدن خونې رئیس شیرباز کمین‌زاده بيا ويلي چې د دایمي ځمکې نه درلودل، د برېښنا پرچاوي، له بانک څخه د پیسو ایستل او له هیواده بهر د خصوصي سکتورتولیداتو ته د ښه بازار نشتوالی هغه څه دي، چې دوی یې له ستونزو سره مخ کړي.

د ملا برادر د دفتر خبرپاڼه زياتوي، چې نوموړي اړوندو ارګانونو ته سپارښتنه وکړه څو د یادو ستونزو د حل په موخه له خصوصي سکتور سره په ګډه کار وکړي.

طالب مقام دا څرګندونې په داسې حال کې کړي، چې ورځ تر بلې له افغانستان څخه د ميلياردونو ډالرو پانګې د فرار او سلګونه فابریکو د تړل کیدو خبرونه ورکول کېږي.

د طالبانو منتقدین دوی تورنوي، چې د افغانستان داقتصادي سقوط او ۹۸ سلنه خلکو د وږي کولو له مسووليت څخه په دې پلمو ځان غواړي خلاص کړي، چې د جمهوري نظام پرمهال د شويو پانګونو او پرمختګونو د پاتې شونو خبرونه خپاره کړي.