تاند:( يکشنبه، د جدي پینځمه) په خوست کې د طالبانو د امنیې قومندانۍ چارواکو ويلي، چې د دغه ولایت په ډنډ پټان ولسوالۍ کې یې دوه تنه پاکستان ته د وسلو د قاچاق په تور نیولي دي.
د دوی په خبره، له نیول شویو کسانو څخه ۷ ام ۱۶، ۱ ام۴، ۷ د ام ۱۶ کونداغونه او ۴۰ د تومانچې شاژرونه ترلاسه شوي دي.
طالبانو د دغو کسانو د نیول کیدو هویت او نور جزییات نه دي روښانه کړي.
د طالبانو منتقدین دوی تورنوي، چې دا ډول خبرونه پر دوی د پاکستان د اغېز د پټولو لپاره خپروي.
څه موده مخکې د پاکستان ایکسپریس ټريبيون ورځپاڼې د ځينو پوځي سرچينو په حواله وويل، چې د پاکستان حکومت به طالبانو نه په افغانستان کې د امريکا او ناټو څخه پاتې پریمانه وسلې او پوځي تجهيزات وپیري.
طالب چارواکو وروسته د يادې ورځپاڼې راپور رد کړ، خو په ټولنيزو رسنيو کې ډېرې داسې ویډیوګانې خپرې شوې، چې افغان پوځي تجهيزات یې پاکستان ته د قاچاق په حال کې ښودل.