تاند:( جمعه، د جدي درېيمه) د پاکستان ابزرور ورځپاڼې پخپل يوه تازه مطلب کې ويلي، چې هندوستان خپل يو شمېر مخکيني دیپلوماتان ګومارلي، چې په افغانستان کې د طالبانو پر وړاندې د مقاومت هڅې همغږي او د منځني اسيا په یوه هېواد کې ورته د دفتر پرانيستلو هڅې همغږي او پیاوړي کړي.
ورځپاڼه د خپلو سرچينو په حواله وايي، چې هندي ديپلوماتانو په دې ترڅ کې د بې واکه شوي ولسمشر محمد اشرف غني له لومړي مرستيال امر الله صالح سره لیدنې کړي.
دغه ورځپاڼه دا هم وايي، چې څو ورځې مخکې په هندوستان کې د افغانستان د وضعیت په اړه د منځنۍ اسيا له هېوادونو سره د جوړې شوې غونډې پر مهال هندي چارواکو افغانستان ته د ملګرو ملتونو د سوله ساتو ځواکونو د استولو د غوښتنې د ملاتړ هیله کړې او ویلي، چې دا کار به د افغانستان د سولې هڅو او ټول ګډونه حکومت له جوړېدو سره مرستندوی تمام شي.
دغې پاکستانۍ ورځپاڼې په ورته وخت کې ادعا کړې، چې هندي ديپلوماتانو د طالبانو پر وړاندې د مقاومت ډلو او پخواني ولسمشر حامد کرزي تر منځ د اړيکو د ټينګښت او همغږي کولو لپاره هم هڅې کړي.
د ورځپاڼې د معلوماتو له مخې، حامد کرزي د مقاومت ډلو ته مشوره ورکړې، چې د منځنۍ اسيا په یوه ګاونډي هېواد کې د افغانستان تبعیدي دولت اعلان کړي.
د پاکستان يادې ورځپاڼې د ياد شوي مطلب له خپرولو څو ساعته وروسته دغه مطلب بیرته له خپلې ویبپاڼې لیرې کړی، چې دليل یې نه دی روښانه شوی.
د مقاومت ډلو، هندوستان او حامد کرزي په دې اړه په رسمي ډول څه نه دي ويلي.