تاند:( جمعه، د جدي درېيمه) د افغانستان په شمالي ولايتونو کندوز او تخار ولايتونو کې د يوې ترافيکي پېښې او چاودنې له کبله ۷ تنه وژل شوي او لږ تر لږه ۲ نور ټپيان دي.
ځايي سرچینې وايي، چې ترافيکي پېښه نن سهار، د کندوز – بغلان پر لویه لاره په ګرداب سيمه کې د دوو موټرو د ټکر له کبله رامنځته شوې چې ۵ تنه پکې وژل شوي او يو شمېر نور ټپیان دي.
بل لور ته د تخار ولايت په دينګي قلعه سیمه کې د ماین چاودنې دوه تنه ماشومان ووژل او دوه نور يې ټپيان کړل.
سرچینې وايي، چې دا ماین له وروستیو جګړو په سیمه کې پاتې و.
په وروستيو کې د ترافيکي پېښو او زړو ماینونو د چاودنو له کبله د مرګ ژوبلې راپورونه زيات شوي دي.
د ترافیکي پېښو دلیل د موټر چلوونکو د بې احتياطۍ تر څنګ په لويو لارو کې د ترافيک پرسونل کمښت او نشتوالی ګڼل کېږي.
د افغانستان په مختلفو سيمو کې ترافیک پرسونل شکايت کوي، چې طالبانو له څو میاشتو راهیسې معاشونه نه دي ورکړي او دا کار يې د دندې د متاثره کيدو سبب شوی.
د زړو ماینونو د چاودنو د زیاتیدو یو دلیل هم په هېواد کې وروستۍ بې نظامي ګڼل کېږي.
د ماین پاکولو ګڼو موسسو ويلي، چې د طالبانو له واکمنیدو سره بهرنيو تمویلونکو پرې بوديجه یا بنده کړې او يا کمه کړې، چې د کارونو د خنډ او ځنډ سبب شوی دی.