تاند:( چار شنبه، د جدي لومړۍ)‏ ‏‏د طالبانو د اوبو او انرژۍ وزارت د اوبو مرستيال انجنیر مجیب الرحمن عمر د یوې خبري غونډې پر مهال د اوبو کنټرول، مدیریت او مهارول د دغه وزارت له لومړیتوبونو څخه ګڼلی.

هغه تور پورې کړ، چې د هېواد د اوبو سرچینو د ناسم مدیرت له امله د افغانستان نږدې ۶۰ سلنه خلک پاکې اوبه ته لاسرسی نلري او د هېواد نیمايي ځمکې نه کرل کېږي.

د عمر په خبره؛ هڅې کوي چې افغانستان د برېښنا له پلوه په یو صادروونکي هېواد بدل شي.

عمر په راتلونکې کال کې د ځینو پروژو د کار د پیل یادونه وکړه او له هېوادوالو څخه یې وغوښتل چې د ملي پروژو په جوړولو او ساتنه کې ورسره

 مرسته او همکاري وکړي.

دغه طالب مقام خبرداری ورکړ چې که د افغانستان تر ځمکې لاندې اوبو څخه سالمه استفاده و نه شي، نو هېواد به له یو ستر ناورین او بحران سره مخ شي.

 د اوبو او انرژۍ وزارت ویاند مولوي اختر محمد نصرت بیا ویلي، چې په تېرو څلورو میاشتو کې د دغه وزارت په عوایدو کې زیاتوالی راغلی دی.

د نصرت په خبره؛ په تېر نظام کې د اوبو او انرژۍ وزارت عواید په یوه ورځ کې له ۲۰ څخه تر ۲۸ میلیونو افغانیو پورې وو، خو اوس دغه عواید په ورځ کې څه ناڅه ۵۹ میلیونو افغانیو ته رسېږي.

طالب مقام دا څرګندونې په داسې مهال کوي، چې مخکيني حکومت طالبان د ګاونډيو هېوادونو په اشاره د اوبو مدیریت د هڅو په ننګولو تورنول.

د طالبانو داسې څرګندونې، د‌ دوی منتقدین له عامه ذهنیت سره لوبه او تبلیغات ګڼي، چې په وينا يې خلک ورسره تېر باسي.

د عوايدو د زياتېدو پرله پسې خبرې په داسې وخت کیږي، چې خلک له دې عوايدو د مامورینو د معاشونو او عامه خدماتو د نه ترسره کیدو شکايت لري.