تاند:( شنبه ، د قوس اووه ویشتمه) د افغانستان د سولې لپاره د امريکا متحده ايالاتو ځانګړی استازی ټام ويسټ نن د پاکستان پلازمېنې اسلام اباد ته رسېدلی، څو د افغانستان د بشري ناورين په اړه د اسلامي هېوادونو د همکاريو سازمان په سبانۍ غونډه کې برخه واخلي
نوموړي د دغه سفر په ترڅ کې ويلي، چې سبانۍ غونډه پر وخت او مهم اقدام دی.
ټاکل شوې، چې د افغانستان د بشري ناورين په اړه د اسلامي هېوادونو د همکاريو سازمان غونډه سبا ترسره شي.
د پاکستان د بهرنيو چارو وزير شاه محمود قريشي پرون خبرداری ورکړ، چې که د افغانستان د بشري ناورين د مقابلې لپاره عاجلې مرستې ونه شي، داعش او القاعده به دغه وضعيت نه په خپله ګټه کار واخلي.
د ملګرو ملتونو په حواله، ۲۴ میلیونه افغانان د طالبانو له واکمنیدو سره سخت فقر سره مخ او بې ډوډۍ شوي، چې د میلیونونو د مرګ ګواښ یې را منځته شوی دی.
اوړمه شپه د کابل په ګاونډي ولايت پروان کې يوه بېوزله سړي له ډېر فقر او لوږې څخه ځان زندۍ کړی او وژلی دی.
په وروستيو ورځو کې د فقر له کبله د ورته ځان وژنو راپورونه زيات شوي، خو طالبان يې تر ډېره ردوي او بې بنسټه یې بولي.
څه موده مخکې د طالبانو يوه مهم سياسي مشر انس حقاني وويل، چې له لوږې څوک نه مري، ځکه د رزق ذمه خدای تعالی کړې او انسان په واښو خوړلو هم ژوندی ساتي.
د هغه دا څرګندونې په پراخه کچه له توندو غبرګونونو سره مخامخ شوې، خو طالب وياندويانو او تبلیغاتي مبلغينو یې په اړه ملت ته ځواب او قناعت ورنه کړای شو.