تاند:( شنبه ، د قوس اووه ویشتمه) د پاسپورټ ریاست لپاره د طالبانو ټاکل شوی رئیس عالم ګل حقاني وایي، چې سر له سبا به په کابل کې د پاسپورټونو د وېش دریدلی بهیر بیرته پيل شي.
د ده په وینا، په دغه لړۍ کې به یوازې د کابل اوسیدونکو ته پاسپورټونه ورکړل شي.
هغه له نورو خلکو غواړي، چې پاسپورټونه په خپلو اړوندو ولایتونو کې ترلاسه کړي.
د ده په وینا، د پاسپورټ د ترلاسه کولو لپاره به خلک نور په انلاین ډول نوم لیکنه کوي.
هغه د انلاین فورم د نوي کیدو خبر هم ورکړی.
د حقاني په خبره، د پنجشنبې پر ورځ به یوازې د طالبانو د اسلامي امارت غړو او جنګیالیو ته د پاسپورټونو د وېش چارې ترسره شي.
دا په داسې حال کې ده، چې خلک د پاسپورټونو د ترلاسه کولو په چاره کې د پراخې ګډوډۍ او فساد ادعا لري او وایي، چې له پیسو پرته یې په اسانه څوک کار نه ترسره کوي.
د پاسپورټ ریاست مسوولین بیا دا ستونزه د کمیشن کارانو او مخکینیو کارکوونکو په غاړه اچوي او وایي، چې لسګونه تنه یې د پاسپورټ د وېش بهیر کې د فساد او کمیشنکارۍ په تور نیولي دي.
د طالبانو له واکمنیدو سره په میلیونونه افغانان له مختلفو قانوني او ناقانوني لارو غواړي هېواد پریږدي او د دې کار لپاره په عاجل ډول پاسپورټونه ترلاسه کړي.
اوج ته رسیدلی فقر او اقتصادي ناورین، د ژوند لپاره سخت شوي ملایي قیودات او د فردي ازادۍ او اساسي حقونو نقض، بې کاري او په راتلونکي بې باوري د دغه وضعیت اساسي دلایل ګڼل شوي دي.