تاند:( شنبه ، د قوس شلمه) د امریکا نیویورکر مجلې په یوه تازه مطلب کې د افغانستان د سولې بهیر لپاره د امریکا د مخکیني ولسمشر ډونالډ پرمپ د ځینو پټو پلانونو افشاګري کړې ده.
مجلې دغه راز له طالبانو سره د ټرمپ د سولې معاملې د عملي کیدو او د افغانستان د پرځول شوي جمهوري نظام له مشرتابه سره د اوسني امریکایي حکومت د بې باکانه چلند کیسې را اخیستي دي.
سرچینه لیکي، چې مخکیني ولسمشر ټرمپ خلیلزاد ته دا هم ویلي و، چې طالب مشرانو ته د سولې لپاره پیسې ورکړي، خو خلیلزاد ویلي و چې طالب مشران د امریکا د بندیزونو په لیست کې دي او پیسې نه شي ورکول کیدای.
دغه مجله دا هم لیکي، چې د بندیزونو موضوع کې امریکایي چارواکي دوه ګونی چلند لري.
سرچینه د افغانستان د بې واکه شوي ولسمشر اشرف غني کیسه کوي، چې غوښتل یې د ایران د اوسني ولسمشر ابراهیم رئیسي د لوړې مراسمو ته لاړ شي، خو د امریکا برحاله خارجه وزیر انتوني بلینکن ورته وویل، چې ایران د دوی د بندیزونو لیست کې دی او د غني ورتګ به دغو مراسمو ته ښې پایلې ونه لري.
نیویورکر مجلې دا هم ویلي، چې امریکایي چارواکو د جمهوري نظام له سقوط څخه یوه ورځ مخکې د اګست په ۱۴ مه د افغانستان د ملي امنیت سلاکار حمدالله محب هغو پيغامونو ته هیڅ ځواب نه و ورکړی، چې پوښتلي یې وو: آیا زه او ولسمشر غني به هم ستاسې د تخلیې له پروګرام څخه برخمن شوو؟
خلیلزاد او ټرمپ دغه راپور ته کوم غبرګون نه دی ښودلی.
په افغانستان کې د جمهوري نظام له سقوط څخه وروسته، پر امریکا دا نیوکه جدي شوې چې د افغانستان پر نظام او شل کلنو لاسته راوړنو یې سخته معامله وکړه او هرڅه یې په اوبو لاهو کړل.
زموږ د ګران هیواد افغانستان په اړه؛ ټرامپ او خلیل زاد د معاصری ډیپلوماسۍ تر ټولو ریشخنده او تراژیک بازیګران ول، چي مخ دې پرته سي!