تاند:( شنبه ، د قوس شلمه) په داسې حال کې چې يو شمېر طالب وياندويان دولتي کارکوونکو ته د درې او دوه مياشتې معاشونو د ورکړې ادعاوې کوي، د دوی یوه سرسخته ملاتړي او د حزب اسلامي مشر ګلبدين حکمتيار ويلي، چې دولتي کارکوونکو له ۴ مياشتو راهيسې خپل معاشونه نه دي تر لاسه کړي.
ښاغلي حکمتيار پرون د جمعې ورځې د لمانځه په خطبه کې دا هم وويل، چې دغه دولتي کارکوونکي د خپلو لګښتونو لپاره اړ شوي چې د کور بړستنې ظرفونه او نور لوښي وپلوري.
هغه امريکا متحده ايالات او متحدین یې په افغانستان کې د دغه وضعيت مسوول وګڼل او ټینګار یې وکړ، چې د افغانستان د بانکي زېرمو کنګلول د دغه اقتصادي ناورين اصلي دلیل دی.
د هغه په وينا، د بهرنيو بندیزونو بیه اوسني چارواکي نه، بلکې عام خلک پرې کوي.
حکمتيار دا هم وويل، چې امريکا په کابل کې د خپل سفارت د پرانيستلو لپاره د په افغانستان کې د دوو زرو امريکايي سرتېرو حضور شرط کړی.
طالبانو او امریکایانو په دې اړه څه نه دي ويلي.
د دولتي کارکوونکو د معاشونو په اړه د حکمتیار څرګندونې په داسې مهال دي، چې طالب چارواکي په دې اړه ضد و نقيضې ادعاوې کوي.
تېره مياشت د طالبانو ماليې وزارت مامورينو ته د ۳ مياشتې معاشونو د ورکړې خبر ورکړی و.
دوه اونۍ مخکې همدې وزارت د درې میاشتو پر ځای د دوه مياشتو د معاشونو د ورکړې اعلان وکړ.
تېره پنجشنبه د ماليې وزارت یوې سرچينې تاند ته وويل، چې خپله د دغه وزارت کارکوونکو ته يوازې د يوې مياشتې معاش، هغه هم د نوي نورم له مخې ورکړل شوی، چې د پخواني معاش نيږدې نيمايي هومره کم و.
د ځینو دولتي کارکوونکو په وینا، چې ان د تېرې اسد میاشتې معاشونه نه دي ورکړل شوي، چې په دې حساب یې د بې معاشۍ ۴ مياشتې کيږي او پینځمه مياشت په پوره کیدو ده.
د هغوی په وینا، طالبانو د واکمنۍ پيل يې خلکو ته په دروغ ويلو کړی او ژر یې خپل باور د لاسه ورکړی.
د طالبانو يوه مقام سهیل شاهین تېره چهارشنبه ادعا وکړه، چې دولتي کارکوونکو ته د ۳ مياشتو معاشونه ورکړل شوي دي.
دجنګی ډلو مشران ځکه د بی معاشی بغاری وهی چی د غنی له خوا دوی او د دوی ۸۰۰ تنه باډیګاردانو او په دارالامان کی یی دقصر په کارکوونکو هغه پخوانی پیسی ودریدی دوی په حقیقیت کی هغه یادوی د ولس غم ورسره ندی