تاند:( سې شنبه، د قوس دويمه) د طالبانو د بهرنیو چارو وزارت سياسي مرستيال شیر محمد عباس ستانکزي دندې ته له حاضریدو وروسته خپلې چارې رسمآ نيمروز ولايت ته په سفر پیل کړي دي.
د باختر آژانس د راپور په حواله، عباس ستانکزي نیمروز ته په سفر کې د کمال خان بند وکوت او هېوادوالو ته یې د دې سترې پروژې د چارو د چټکوالي او ساتني ډاډ ورکړ.
دا لومړی ځل دی چې د طالبانو له واکمنیدو وروسته د دوی يو لوړ پوړی چارواکی له کمال خان بند څخه لیدنه کوي.
ياد شوی بند د ولسمشر غني د واکمنۍ په وروستيو کې پرانيستل شو.
ايران د کمال خان بند د جوړېدو شديد مخالف و او ويل کيږي، چې د بند پر ضد يې ډېر بریدونه او نا امنۍ سمبالولې.
ولسمشر غني له خپل حکومت سره د ایران د پردې تر شا مخالفت او طالبانو نه ملاتړ هم د کمال خان بند له کبله ګڼله او ویل، چې د اوبو مدیریت هڅې يې د سيمې هېوادونه نه شي زغملای.
په ټولنیزو رسنیو کې یو شمېر افغانانو له ياد شوي بند څخه د دغه لوړپوړي طالب مقام لیدنه ستايلې او د اوبو مدیریت په برخه کې د تېر حکومت د پروګرامونو د دوام غوښتنه کړې ده.
د طالبانو منتقدینو بیا ویلي، چې د بهرنيو چارو وزارت سياسي مرستيال له کمال خان بند او امنیت سره يې څه کار لري؟