تاند:( شنبه، د عقرب دوه ويشتمه) تاجیکستاني چارواکو د خپلې خاورې له لارې، افغانستان ته د نړیوالو مرستو د انتقال په اړه د لابي کولو لړۍ چټکه کړې ده.
په تازه ګام کې، په روسیه کې د تاجیکستان سفیر گل محمودزاده ، د افغانستان لپاره د ناټو سازمان له استازي توماس نیکلاسون سر لیدلي او ورته ویلي، چې هېواد یې چمتو دی څو افغانستان ته د نړیوالو مرستو لېږد ته په ترانزیتي برخه کې د مرستې لاس ورکړي.
د تاجیکستان ولسمشر امام علي رحمان هم د روانې نومبر میاشتې په درېیمه، د افغانستان په اړه د یوې غونډې پرمهال وویل، چې دوی د خپلې خاورې له لارې افغانستان ته د نړیوالو مرستو د لېږد لپاره مرستې ته چمتو دي.
یاد شوي هېواد مخکې د طالبانو په مخالفت او پر ضد يې د احمد مسعود په مشرۍ د مقاومت جبهې د فعالیتونو ملاتړ کاوه.
تاجيکستان د طالبانو مخالفت اوس هم کوي، خو تر پخوا يې کچه کمه شوې ده.
د تاجيکستان برعکس، د منځنۍ اسيا يو شمېر نور هېوادونه توانيدلي، چې د طالبانو د نه مخالفت له کبله افغانستان ته د نړيوالو بشري مرستو په ترانزيت کې همکار شي او له دې اړخه امتيازاتو نه برخمن شي.
معلومه نه ده، چې د بشري مرستو له دوام سره به نړيوال له تاجيکستان سره د ترانزيت په اړه پايلې ته ورسيږي کنه؟