تاند (د عقرب ۲۲مه) — د ختیځ ولایت ننګرهار په مرکز جلال اباد ښار کې د الفلاح په نامه یوه خصوصي پوهنتون له بېلابېلو پوهنځیو څخه په سلګونو کسان فارغ او د خدمتونو ترسره کولو لپاره ټولنې ته وړاندې کړل.
د دغه پوهنتون د اقتصاد، شرعیاتو، حقوق او سیاسي علومو، انجنیرۍ او ژورنالېزم پوهنځیو د څلورو دورو د فارغانو د فراغت غونډه چې سلګونو تنو فارغانو په کې ګډون کړی و، د پنجشنبې په ورځ /د عقرب ۲۰مه/ د یو لړ مراسمو په ترڅ کې ترسره شوه او فارغان ټولنې ته د خدمت لپاره وړاندې شول.
د غونډې په پیل کې د الفلاح پوهنتون رئیس ډاکتر سید معشوق سادات فارغانو او د هغوی د کورنيو غړو ته وویل چې په خپلو اړوندو رشتو کې خپلو هېوادوالو ته خدمت او د افغانستان ودانولو ته کار وکړي.
ښاغلي سادات په علمي او تحصيلي برخو کې يو شمېر ستونزې او غوښتنې د طالبانو د لوړو زده کړو له مسئولینو سره د حل په موخه شريکې کړې او زیاته یې کړه چې افغانان نور د وطن پرېښودلو او په نورو اتکاء نه خوښوي، نو په کار ده چې مسلکي کسانو ته په خپلو اړوندو کاري برخو کې د کار فرصتونه برابر شي.
د ننګرهار ولایت سرپرست ندا محمد ندیم وویل چې حکومت به یې د دیني علومو د فارغانو تر څنګ د عصري علومو د فارغانو او مسلکي کسانو لپاره په اړوندو برخو کې کاري فرصتونه برابر کړي.
په دې غونډه کې د طالبانو د لوړو زده کړو وزارت علمي او مسلکی معين دوکتور لطف الله خيرخوا وويل، چې حکومت به یې د دولتي او خصوصي پوهنتونونو ترمنځ موجودې فاصلې ختمې کړي او ډاډ یې څرګند کړ چې ټولو خصوصي پوهنتونونو ته به د دولتي پوهنتونونو په څېر پاملرنه وکړي.