تاند (چهارشنبه، د عقرب۱۹مه) د افغانستان لپاره د امریکا ځانګړی استازي ټام ویسټ وايي، واشنګټن په افغانستان کې د داعش د بریدونو له درکه د اندېښنې په خاطر د طالبانو د حکومت د رسمیت پېژندلو په اړه سلا مشوره کوي.
د رویټرز خبري اژانس د راپور له مخې، ویسټ دا خبره له بروکسل څخه د ټېلفون له لارې خبریالانو ته وکړه.
ده په بروکسل کې د ناټو غړیو ته د امریکا او طالبانو د خبرو په اړه معلومات ورکړل.
د رویټرز د راپور له مخې، ښاغلي ویسټ وویل، د ناټو له غړیو سره یې د طالبانو د حکومت د رسمیت پېژندلو د لارې د نقشې په اړه هم مشورې وکړې.
د افغانستان لپاره د امریکا ځانګړي استازي وویل «طالبانو د بشري مرستو، کابل ته د دیپلوماتیکې ټولنې د بېرته ستنېدو او د بندیزونو د لېرې کېدو په وړاندې په خورا څرګند ډول خپله لېوالتیا ښکاره کړې چې له نړیوالې ټولنې سره خپلې اړیکې عادي کړي.»
ده په عین حال کې وویل چې د امریکا متحد ایالتونه په یوازې توګه یو کار هم نه شي کولی.
وروسته له دې چې ټام ویسټ د افغانستان لپاره د امریکا ځانګړی استازی ټاکل شوی، دا یې لومړنۍ څرګندونې دي چې له رسنیو سره یې کوي.
ویسټ تېره میاشت د زلمي خلیلزاد په ځای د افغانستان لپاره د امریکا ځانګړی استازی وګومارل شو.
ټاکل شوې ده چې ښاغلی ویسټ پاکستان، هند او روسیې ته هم لاړ شي.
ده وویل، د امریکا متحد ایالتونه له طالبانو سره په دوحه کې بل پړاو خبرو ته تیاري نیسي، خو ویې نه ویل چې د دواړو خواوو بل پړاو خبرې به کله وي.