تاند:( پنج، د عقرب ديارلسمه) د روسیې د بهرنیو چارو وزارت وايي، چې په افغانستان کې د طالبانو له واکمنیدو سره، د روسیې خلاف ګواښونو کې کمښت نه دی راغلی.
د دغه وزارت ویاندې ماریا زاخارووا په یوه خبري ناسته کې ویلي، چې د نیشه یي توکیو او ترهګریزو بریدونو له پلوه لا هم له افغانستان څخه دغه هېواد ته ګواښونه موجود دي.
هغې خواشیني ښودلې، چې د طالبانو له واکمنیدو سره بیا هم په دې برخه کې د پام وړ کمښت نه دی رامنځته شوی.
د روسیې د بهرنیو چارو وزارت ویاندې په ځانګړې توګه د داعش ډلې ګواښ ته اشاره کړې او ویلي، چې دا ډله لا هم د افغانستان په مختلفو ښارونو کې بریدونه کوي او روسیه یې اندیښمنه کړې ده.
نوموړې نه دي ویلي، چې د دغو ګواښونو د کمیدو او خطرونو ختمولو لپاره یې د هېواد اساسي غوښتنې څه دي؟
مخکې د روسیې ولسمشر ولادیمیر پوتین ویلي و، چې له منځنۍ اسیا سره په ګډو پولو کې د افغانستان له خاورې شاوخوا دوه زره داعش وسله وال منځنۍ اسیا ته د اوښتو پلان لري.
هغه خبرداری ورکړی و، چې که دا خطر دفع نه شي، روسیه او ملګري هېوادونه به یې د دغو وسله والو د ځپلو لپاره په افغانستان کې عملیات وکړي.
د افغانستان د ملي امنیت پخوانی رئیس رحمت الله نبیل همدا اونۍ فارن پالېسۍ ته ویلي و، چې د روسیې په ګډون د افغانستان ګاونډیان او سیمه ییز هېوادونه له طالبانو سره دوه ګونې لوبه کوي او سم ملاتړي یې نه دي.
د روسیې په اړه نبیل ویلي و، چې له طالبانو څخه یې د سیمه ییزو ګواښونو د مهار تمه لرله، خو دا چې تمه یې نه ده پوره شوې، اوس له یوې خوا ازبکستان طالبانو سره پراخو اقتصادي همکاریو ته هڅوي او له بل لوري یې تاجیکستان د طالبانو خلاف د مقاومت جبهې مرکز ګرځولی دی.
طالبانو بیا ویلي، چې داعش ډله په افغانستان کې واضح فعالیت او ځواک نه لري او د مزاحمتي هڅو د مهار لپاره یې دوی کافي قوت په واک کې لري.
له دې سره، اوړمه ورځ د کابل په تر ټولو مهمه دیپلوماتیکه سیمه( وزیراکبرخان) کې داعش ډلې د افغانستان پر تر ټولو ستر پوځي روغتون( سردار داودخان څلور سوه بستریز روغتون) برید وکړ، چې په ترڅ کې یې د طالبانو د مرکزي قول اردو د قومندان په ګډون لسګونه طالبانو او ملکیانو ته مرګ ژوبله واوښته.
امریکا متحده ایالات هم په افغانستان کې د داعش او القاعدې ډلې د فعالیتونو په اړه ژوره اندیښنه لري.
د امریکا د دفاع وزارت مرستیال ویلي، چې داعش ډله د ۶ میاشتو په موده او القاعده د دوه کلونو په موده کې له افغان خاورې پر امریکا د برید وړتیا برابرولی شي.
د افغانستان لپاره د امریکا مخکیني استازي زلمي خلیلزاد بیا ویلي، چې امریکا به له افغان خاورې د القاعدې ډلې د خطر جدي کیدو په صورت کې یو ځل بیا پر افغانستان برید وکړي.