تاند:( پنج، د عقرب ديارلسمه) د پاکستان ملت ورځپاڼې نن په افغانستان کې د داعش ډلې د فعالیتونو د ګواښ زیاتیدو په اړه یو تحلیلي مطلب کې لیکلي، چې طالبان دا ډله جدي ګواښ نه ګڼي، خو د کابل پر سردار داودخان پوځي روغتون د داعش ډلې د دې اونۍ برید د یادې ډلې د خطر شدت ثابت کړ.
د ورځپاڼې د شننې له مخې، تراوسه دې ډلې په هدفي او نورو بریدونو کې عام خلک او ټيټ پوړي طالبان نښه کول، خو وروستۍ پېښې وښوده چې د ملا حمدالله مخلص په شان د طالبانو ځواکمن قومندانان هم له دغو بریدونو سره وژل کیدای شي.
حمدالله مخلص ته د طالبانو د ارګ فاتح ویل کیده.
هغه، چې د حقاني شبکې د بدري ځواک د خطرناکې قطعې قومندان و، د مرګ تر ورځې یې د طالبانو د مرکزي قول اردو قومنداني پر غاړه لرله.
نوموړی پر داود خان څلور سوه بستریز روغتون د داعش ډلې د برید په ورځ خپله د برید ځای ته ورځي او داعش ډلې سره په جګړه کې وژل کیږي.
د پاکستان ملت ورځپاڼې ویلي، چې دا خطرناک وضعیت ممکن طالبان له امریکا متحده ایالاتو سره د داعش ډلې خلاف ګډې مبارزې ته مجبور کړي.
ورځپاڼه وړاندوینه کوي، چې ممکن طالبان له امریکا سره د داعش پرضد په دې سلا شي، چې د امریکا بې پيلوټه الوتکې به په افغانستان کې د داعش ډلې پټنځایونه او جنګیالي هدف ګرځوي.
طالبانو رسماً په دې اړه څه نه دي ویلي،خو له واک ته رسیدو وروسته یې په دوحه کې له امریکایي پلاوي سره د مذاکراتو پر مهال په داعش ضده مبارزه کې د امریکا د مرستې وړاندیز رد کړی و.
د طالبانو په باور، داعش ډله افغانستان کې د پښې ځای او ځواک نه لري او دوی ورته د ګواښ پرځای د یوه ځپل کیدونکي مزاحمت په سترګه ګوري.
له دې سره، د امریکا متحده ایالاتو ترڅنګ روسیه او د سیمې هېوادونه بیا د یادې ډلې د فعالیتونو پراختیا ته اندیښمن دي.
د روسیې د بهرنیو چارو وزارت ویاندې ماریا زاخارووا په ځانګړې توګه د داعش ډلې ګواښ ته اشاره کړې او ویلي، چې دا ډله لا هم د افغانستان په مختلفو ښارونو کې بریدونه کوي او روسیه یې اندیښمنه کړې ده.
د امریکا د دفاع وزارت مرستیال ویلي، چې داعش ډله د ۶ میاشتو په موده او القاعده د دوه کلونو په موده کې له افغان خاورې پر امریکا د برید وړتیا برابرولی شي.
د افغانستان لپاره د امریکا مخکیني استازي زلمي خلیلزاد بیا ویلي، چې امریکا به له افغان خاورې د القاعدې ډلې د خطر جدي کیدو په صورت کې یو ځل بیا پر افغانستان برید وکړي.
امریکایي چارواکو د داعش ډلې په اړه په ښکاره ویلي و، چې په سیمه کې د خپلو استخباراتي امکاناتو او هوایي ځواک څخه په استفادې به یې په افغانستان کې وځپي.
دوی په دې برخه کې د طالبانو سلا او اجازه هم اړینه نه وه ګڼلې، خو طالبانو ویلي چې ټول هېوادونه باید د افغانستان هوایي او ځمکني حریم ته درناوی ولري.