تاند(جمعه، د عقرب ۷مه) د جرمني د کورنیو چارو وزیر له بیلاروس سره د اروپايي اتحادیې د لوېدیځو پولو له لارې د زرګونو کډوالو د نوې لویې څپې په اړه خبرداری ورکړ.
د جرمني د کورنیو چارو وزیر هورست شیهوفر (Horst Seehofer) پرون (پنجشنبې) بیلډ تلویزیون ته په مرکه کې وویل، د کډوالو د دې نوې څپې اکثره د منځني ختیځ او افغانستان پناه غوښتونکي دي.
«دوې ورځې مخکې په دوو کلونو کې د لومړي ځل لپاره موږ په یوه ورځ تر ۱۰۰۰ ډېر کډوال لرل. که دا په میاشت کې ضرب کړئ، بیا نو تاسو پوهېږئ چې اقدام ته فوري اړتیا ده.»
ده د کډوالو د بحران د بدتره کېدو د مخنیوي لپاره د اروپايي اتحادیې د ګډې ستراتیژۍ غوښتنه وکړه.
د جرمني د کورنیو چارو وزیر ټینګار وکړ «د کډوالو د ستونزې حل یوازې د اروپايي اتحادیې په وسیله ممکن دی.»
د جرمني د کورنیو چار وزارت پر اساس، دې هیواد له پولنډ سره په خپله پوله کې ګزمې زیاتې کړي او دې پولې ته یې ۸۰۰ اضافي پولیس لېږلي چې د هغو کډوالو مخه ونیسي چې له بیلاروس څخه د اروپايي اتحادیې هیوادونو ته ننوځي.
ویل کېږي چې له څو اوونیو راهیسې کډوال، چې اکثره یې د عراق، سوریې او افغانستان اتباع دي، له پولنډ څخه جرمني ته داخلېږي. دا کسان لومړی بیلاروس ته تللي او له هغه ځایه یې اروپايي اتحادیې ته ننوتي دي.
د روان اکتوبر په لومړیو کې د بخښنې نړیوال سازمان یا ایمنستي انترنشنل د پولنډ د پوله ساتو له لوري له افغان کډوالو سره د ځیږ چلنډ په خاطر نیوکې وکړې.
امنیسټي انټرنشنل په دې ژوره اندېښنه ښکاره کړه چې د اګسټ له میاشتې راهیسې د پولنډ او بېلاروس په پوله کې له ۳۲ افغانانو څخه ۱۷ تنه لا هم بند پاتې دي.
د اګسټ په ۲۵مه نېټه د اروپا د بشري حقونو محکمې پولنډ ته حکم وکړ چې دغو ۳۲ افغانانو ته خواړه، اوبه، جامې او په کافي اندازه دارو – درمل ورکړي.
محکمې همدا راز امر کړی چې د امکان په صورت کې هغوی ته موقتي سرپناه هم برابره کړي.
د سېپټمبر په ۲۷مه محکمې د خپل حکم موده تر بلې خبرتیا پورې اوږده کړه او همدا راز یې امر وکړ، تر څو چې دا کسان د پولنډ په خاوره کې وي، باید بېلاروس ته ونه ګرځول شي، خو له دې سره-سره د پولنډ د کابینې د اګسټ د پرېکړې پر اساس دا کسان بېلارس ته وګرځول شول.
پولنډ د سېپټمبر له دوهمې نېټې څخه په خپله پوله کې بېړنی حالت اعلان کړی او له همدې کبله دې سیمې ته خبریالان، د پارلمان غړي او فعالان نه شی تللی.
خو چرمني وېره لري چې د ۲۰۱۵ پېښه تکرار نه شي. په هغه کال سلګونه زره کډوال جرمني ته ورغلل.