تاند (سې شنبه، د میزان ۲۶مه) د آیسنلنډ (وری) فلم د بېروونکو فلمونو په برخه کې د فانتزي او ډاروونکو فلمونو په فیستوال (سیتخس) کې د غوره فلم جایزه وګټله.
د هالیووډ ریپورټر د راپور له مخې، دا فلم، چې د ایسلنډ د والډیمر یوهانسن لومړنی فلم و، سږ کال د فرانسې د کن په فلم فیسیتوال کې هم نندارې ته وړاندې شوی و.
په دې فلم کې، چې د آیسلنډي شپنو کیسه بیانوي، د سکندیناویا فولکلوري افسانې د وحشت له کلاسیکو عناصرو سره اخښل شوي چې حیرانوونکې بڼه یې خپله کړې ده.
د هسپانیا سیتخس فیستوال د اکتوبر په ۸ پیل شوی و او د اکتوبر په ۱۷ مه پای ته ورسېد.
په هسپانیا کې دا فیستوال له ۱۹۶۷ څخه پیل شوی او په نړۍ کې د فانتزي او بېروونکو فلمونو تر ټولو مشهور فیستوال ګڼل کېږي.