تاند:( سی شنبه، د ميزان شپږ ويشتمه) د طالبانو د دفاع وزارت مرستيال ملا فاضل اخوند وايي، چې د هېواد د سرحدونو د دفاع لپاره يوه پياوړې او ملي اردو جوړوي.
نوموړي شبرغان ښار ته د سفر پر مهال امر کړی، چې د عبدالرشيد دوستم په ماڼۍ کې دې طالبانو ته پوځي مرکز جوړ کړل شي.
فاضل اخوند د ملي اردو د جوړولو په اړه نور جزییات نه دي ورکړي.
د طالبانو دغه مشهور قومندان د دوی په لومړۍ دوره واکمنۍ کې هم د دفاع وزارت مرستيال و.
هغه د طالبانو د واکمنۍ په وروستيو کې له دوستم سره د جګړې لپاره د هېواد شمال ته لاړ، چې په ترڅ کې يې اسیر او د دوستم لخوا د طالبانو له سقوط وروسته امریکايانو ته وسپارل شو.
ملا فاضل اخوند امريکايانو ته له سپارل کيدو وروسته، ډېر کلونه په ګوانتانامو زندان کې بندي و.
هغه د امريکا او طالبانو د څو کاله مخکې سولې خبرو پر مهال له ګوانتانامو زندانه خوشې او تېر کال له دوستم سره په مسکو ناسته کې مخامخ شو.
ځينو خبري سرچينو هغه مهال دوستم سره د نوموړي د لفظي شخړې خبر هم ورکړ.
دوستم د جمهوري نظام له سقوط څخه څه موده مخکې خپل پلرني ټاټوبي ته د طالب ضدې جګړې لپاره لاړ او طالبانو ته يې خبرداری ورکړ، چې د ملا فاضل په شان به جنګ کې ماتې وخوري.
دوستم، چې اوس په ترکيه کې دی، د ملا فاضل تازه پریکړې ته يې تر اوسه غبرګون نه دی ښودلی.