تاند (جمعه، د میزان ۲۳مه) د امریکا د متحدو ایالتونو د بهرنیو چارو وزارت د پنجشنبې په ورځ وویل چې نور له افغانستانه د پوځ په مشرۍ د کسانو د ایستلو هیڅ پلان نه لري خو په دې کار کوي چې اوسنۍ چارتر الوتنې زیاتې شي.
د رویټرز خبري اژانس د راپور له مخې، د امریکا د بهرنیو چارو وزارت ویندوی ټید پرایس خبریالانو ته وویل «دا نظر چې موږ د اګست تر یودېرشمې د مخکې په شان د کسانو د ایستلو الوتنې بیا پیلوو، ناسم دی.»
تر دې مخکې وال ستریټ ژورنال ورځپاڼې د امریکا د بهرنیو چارو وزارت د یوې نا څرګندې سرچینې په قول ویلي و چې امریکا به د کال تر پای ته رسېدو مخکې د کسانو د ایستلو الوتنې پیل کړي.
پرایس وویل «چارټر الوتنې معمول دي. زموږ هدف دا دی چې دا ډول الوتنې نورې هم عادي او معمول کړو څو ټول امریکایان او د امریکا د دایمي اقامت لرونکي له افغانستانه وباسو.»
له بلې خوا فاکس نیوز په یوه راپور کې ویلي چې د امریکا حکومت په دې غور کوي چې هغه کسان د بندیزونو له لیسته وباسي چې له ۱۹۹۶ څخه تر ۲۰۰۱ پورې یې د طالبانو په حکومت کې کار کړی دی.
د امریکا د تابعیت او مهاجرت د ادارې د یوه سند له مخې، چې فاکس نیوز ترلاسه کړی، د امریکا د کورني امنیت وزارت پر هغو ټولو افغانانو بندیز پای ته رسوي چې د طالبانو د تېر حکومت په موده کې یې کار کړی دی.