تاند:( چارشنبه، د ميزان يوويشتمه) د امریکا متحده ایالاتو حکومت له افغانستان څخه د خپلو همکارانو د ویستو لپاره نوې همغږې کوونکې معرفي کړې ده.
د دغه هېواد بهرنیو چارو وزارت ویلي، چې نوې معرفي شوې همغږي کوونکې الیزابت جونز نومیږي.
نوموړې مخکې هم د افغانستان په چارو کې د امریکا د بهرنیو چارو وزارت له دیپلوماتانو څخه وه.
تر دې مخکې، په کابل کې د متحده ایالاتو سفیر جان بس دغه چارې تنظیمولې.
په کابل کې د طالبانو له واکمنیدو سره، متحده ایالاتو خپل سفارت تړلی دی.
معلومه نه ده، چې الیزابت جونز به د جان بس پرځای د افغانستان ټولې دیپلوماتیکې چارې مخته وړي کنه؟
ویل شوي نه دي، چې د ښاغلي بس دنده پای ته رسیدلې او که یوازې د دندې دا یوه برخه یې الیزابت جونز ته سپارل شوې ده.
راپورونه وايي، چې په قطر کې د طالبانو او امريکايي پلاوي د روانې اونۍ په مذاکراتو کې هم له افغانستان څخه د خطر څخه مخامخو کسانو د خوندي لېږد په اړه بحث او خبرې شوي.
په دې اړه ډېر جزییات رسنيز شوي نه دي، خو تمه کيږي چې له افغانستان څخه به د نورو خطر سره مخامخو کسانو د لېږد لپاره هڅې روانې وي او ځينې ګامونه به اخيستل کېږي.
طالبانو په دې اړه څه نه دي ويلي، خو له خلکو یې غوښتي چې افغانستان کې پاتې شي.