تاند ( سې شنبه، د ميزان شلمه) د ډيورنډ کرښې د هغې غاړې د ملي جمهوري غورځنګ ګوند مشر محسن داوړ د پاکستان پر صدراعظم عمران خان د يوې وروستۍ مرکې له کبله يې نيوکې کړي دي.
عمران خان په يوه تازه مرکه کې د پاکستان د طالبانو تحريک ټي ټي پي يو پښتون جريان ګڼلی دی.
محسن داوړ د هغه دا څرګندونې د پښتنو د ترهګر ګڼلو هڅه ګڼلې او غندلې ده.
نوموړي له عمران خان څخه غوښتي، چې د دې څرګندونو له امله له پښتنو څخه بښنه وغواړي.
عمران خان د نورو ملتپالو پښتنو له توندو غبرګونونو سره هم مخ شوی.
د دوی په باور، تحريک طالبان پاکستان د پاکستاني استخباراتو يوې پروژې ته ورته هڅه ګڼلای شي، ځکه پاکستاني استخبارات په دې ډول د پښتنو مدني او واقعي نماينده ادرسونه کمرنګه کول غواړي.
پاکستاني پوځ او استخباراتو له څو کلونو راهيسې، د ډیورنډ کرښې هغې غاړې ته د پښتون ژغورنې غورځنګ له پیلیدو سره په مختلفو بڼو هڅه کړې، څو دا غورځنګ تخريب او ورته خنډونه جوړ کړي.
څو ځله د دې خنډ جوړولو د هڅو په ترڅ کې، پاکستاني استخباراتو پښتون ژغورنې غورځنګ د پاکستاني طالبانو په وسيله هم ګواښلی او د فعالیتونو د پراختیا خنډ شوی يې و.