تاند (دوشنبه، د میزان ۱۹مه) استرالیا نن / دوشنبه افشا کړه چې تر ۲۸۰ ډېر اتباع یې لا هم په افغانستان کې بند پاتې دي.
د استرالیايي رسنیو د راپور له مخې، د دغه هیواد د بهرنیو چارو وزارت چارواکو د پارلمان د غړیو د سوال او ځواب په غونډه کې وویل چې د اګست په نیمايي کې د طالبانو لاس ته د کابل له لوېدو وروسته په افغانستان کې د پاتې شویو استرالیایانو په منځ کې ۱۲۹ د استرالیا تابعیت لري او ۱۵۷ نور یې د استرالیا دایمي اقامت لري.
د استرالیا د اې بي سي د راپور له مخې، د دغو کسانو اکثریت نه غواړي چې د کورنۍ غړي یې په افغانستان کې پاتې شي او دوی ورڅخه راووځي.
اې بي سي د استرالیا د بهرنیو چارو وزارت د یوه چارواکي (سیمن نیوهم) په قول وویل «بې له شکه ځینې کسان شته چې نه غواړي راووځي، حتي که د وتلو امکان هم ورته برابر شي، او ځینې د خپلو کورنیو د غړیو یادونه کوي چې په اوسنیو شرایطو کې سفر نه شي کولی.»
ده همداراز وویل، دا کسان غواړي چې وېزه ترلاسه کړي او خپلوان هم له ځان سره راولي.
د استرالیايي چارواکو په وینا تراوسه پورې شاوخوا ۲۶ زره افغان کورنیو د وېزې تقاضا کړې او د ټولو هغو کسانو شمېر، چې د استرالیا د وېزې غوښتنه یې کړې ده شاوخوا یولک کسانو ته رسېږي.
استرالیا د اګست په نیمايي کې ۳۵۰۰ افغانان له افغانستانه وایستل.