تاند:( دوشنبه، د ميزان نولسمه) د طالبانو د اسلامی امارت د بهرنيو چارو سرپرست وزیر مولوی امیر خان متقی او ورسره مل پلاوي نن د قطر په پلازمېنه دوحه کې، د افغانستان لپاره د جرمني خاص استازي جاسپر ویک او د افغانستان لپاره د المان نومول شوي سفیر ماکوس پوتزیل سره لیدلي.
د طالبانو د بهرنيو چارو وزارت وياند عبدالقهار بلخي وايي، چې دا لیدنه په ښه فضا کې ترسره شوه او دواړو خواوو د علاقې وړ پر ټولو موضوعاتو خبرې وکړې.
د سرچينې په حواله، د اجرمني خاص استازي وویل مونږ غواړو افغانستان سره بشري مرستو ته دوام ورکړو. اسلامي امارت یو واقعیت دی، خپل تعامل او رابطې ورسره جاري ساتو.
په دې ليدنه کې د طالبانو اسلامي امارت خارجه وزیر ویلي: موږ د بشري مرستو هر کلی کوواو د نورو هیوادونو سره د مثبت او ښه تعامل غوښتونکي یو.
متقي دغه راز ويلي، د بشري مرستو کارکوونکو او دیپلوماتانو امنیت ته ژمن یو ترڅو خپل کارونه په مصئونه فضا کې ترسره کړي.
دا ليدنه په داسې مهال شوې، چې د طالبانو د وزيرانو شورا نن د بهرنيو بشري مرستو د تنظيم په اړه د يوه پلان د جوړولو لارښوونه وکړه.
افغانستان د طالبانو له واکمنیدو سره، سخت اقتصادي او بشري ناورين سره لاس او ګریوان دی.