تاند:( پنجشنبه، د میزان پینځلسمه) راپورونه وايي، چې تېره شپه د بغلان ولايت په اندراب ولسوالۍ کې د طالبانو او د دوی مخالفو مقاومت ځواکونو تر منځ وسله والې نښتې شوي.
په اندراب کې د مقاومت ځواکونو مشر غني اندرابي ويلي، چې دا نښته تېر ماښام هغه مهال پيل شوه، چې طالبانو پر خنج سيمې برید وکړ.
د نوموړي په وينا، دوی دغه برید په شا تمبولی او د نښتې پر مهال ۱۵ طالبان وژل شوي او ۱۰ نور اسیران شوي.
طالبانو په دې اړه رسنيو ته څه نه دي ويلي.
غني اندرابي، چې په وروستيو کې يې د طالبانو پر ضد په اندراب کې د وسله وال مقاومت اعلان کړی، د پخواني قوماندان احمد شاه مسعود زوی احمد مسعود خپل رهبر ګڼي.
طالبانو بيا ويلي، چې د پنجشېر له نيول کيدو او تاجيکستان ته د احمد مسعود له تېښتې سره د دوی پر ضد د مقاومت لړۍ پای ته رسیدلې ده.