تاند:( پنجشنبه، د میزان پینځلسمه) د امريکا متحده ايالاتو د بهرنيو چارو وزارت مرستياله ميرمن وندي شرمن، چې پرون د هندوستان پلازمېنې نوې ډيلۍ ته په يوه رسمي سفر تللې وه، د افغانستان په اړه یې له هندوستان سره د ګډ فکر او تګلارې د لرلو خبر ورکړی.
نوموړې په دغه سفر کې ویلي، چې د هندوستان امنيتي انديښنې د واشنګټن لپاره لومړیتوب او محوري ارزښت لري.
هغې له خپل هندي سيال سره ګډې خبري غونډې ته وویل: هندوستان او امريکا متحده ايالات د افغانستان په اړه یو ګډ فکر او یوه تګلاره لري.
امریکايي او هندي چارواکو په دې تړاو او دغه راز له طالبانو سره د ممکنه تعاملاتو او مخالفتونو په باره کې څه نه دي ويلي.
هندوستان مخکې ټینګار کړی و، چې د افغانستان خاوره نه بايد د هیڅ کوم هیواد پر ضد وکارول شي.
طالبانو په دې اړه ظاهرا ډېرې ژمنې کړي، خو د یوه مخکیني ډېر ملاتړي هېواد سعودي عربستان په ګډون يې ډېر هېوادونه پر ژمنو بې باوره دي.
هندوستان په افغانستان کې د خپل دښمن ګاونډي پاکستان پراخ نفوذ ته په اندیښنه کې دی.
په کابل کې د طالبانو له واکمنیدو سره سم، هلته د پاکستان د استخباراتي ادارې د مشر مرموز سفر،. هغه هم د طالبانو تر امارت اعلانولو مخکې دا ادعا ډېره کړه، چې طالبان اوس هم لکه پخوا د پاکستان پوره تابع دي او اوامرو نه یې پیروي کوي.
طالبانو بيا دا ډول ادعاوې بې بنسټه او له واقعیتونو څخه لیرې بولي.