تاند:( شنبه، د ميزان لسمه) د افغانستان د نسکور شوي جمهوري نظام د عامې روغتيا وزارت سرپرست ډاکټر وحيد مجروح، چې د طالبانو له واکمنیدو سره يې ۳۷ ورځې له دوی سره هم د روغتيا وزارت د سرپرست په توګه دنده ترسره کړې، د خپلې دغې دندې په اړه په يوه مرکه کې خبرې وکړې.
مجروح له طالبانو سره د خپل کار موده له تجربو ډکه وبلله.
د ده په خبره له طالبانو سره د هرې ورځې د کار په اړه يو کتاب ليکل کیدای شي.
وحيد مجروح په ښکاره ونه ويل، چې له طالبانو څخه خاطرې يې خوږې که ترخې دي.
د هغه له نورو خبرو ښکاريدل، چې طالبانو نه ناراضه دی.
مجروح د مرکې په پای کې يې په دې اړه وپوښتل شو، چې طالبانو ته د افغانستان د روغتيايي نظام په اړه څه وړانديزونه لري؟
د مجروح ځواب دا و، چې طالب حاکمان بايد د افغانستان د مخکيني نظام ټول ظرفيتونه فاسد ونه ګڼي، ورباندې بد ګومانه نه وي او ورڅخه د اړوندو تخصصي برخو د حفاظت او بقا لپاره په سمه توګه ګټه واخلي.
د روغتيا د مخکيني سرپرست وزیر په وینا، چې د طالبانو په واکمنۍ کې دی ظاهرا د روغتيا وزارت سرپرست و، خو د روغتيايي نظام ډېرې واګې د طالبانو د روغتيايي کميسيون په واک کې وې او دی دغه کميسيون ته ځواب ورکوونکی و.