تاند:( جمعه، د ميزان نهمه) د روسیې د دفاع وزارت مرستيال الکساندر فومین په يوه رسمي سفر د پاکستان پلازمېنې اسلام اباد ته رسېدلی.
نوموړی به د دغه سفر په ترڅ کې له پاکستاني چارواکو سره د روسیې او پاکستان د پوځي همکاریو د ګډې کمېټې د غونډې تر څنګ د سيمې امنيتي وضعيت او ګواښونه بحث او وڅېړي.
ويل شوي، چې په دفاعي، امنيتي او اطلاعاتي برخو کې د همکاریو ترسره کیدل، ګډې پوځي مانورۍ او د پوځي تجهيزاتو په جوړولو کې د يوبل مرسته د دغه سفر نوړې عمده موخې دي.
پاکستان په وروستيو کې له امریکا متحده ایالاتو څخه په فاصله او سيمه ييزو قدرتونو سره د لا نيږدې کیدو په حال کې ښکاري.
په افغانستان کې د طالبانو له واکمنیدو سره، پر پاکستان د لویدیځو هېوادونو نیوکې په زیاتیدو دي.
هغوی دا هېواد تورنوي، چې د طالبانو په واکمنولو او د افغانستان د جمهوري نظام په نسکورولو کې يې د طالبانو ښکاره لاسنیوی کړی.
د متحده ايالاتو د سنا جرګې خو له دې کبله، د طالبانو تر څنګ پر پاکستان هم د بندیزونو د لګولو غوښتنه کړې ده.
پاکستاني چارواکو که څه هم په ښکاره او ان دیپلوماتیکه کچه د طالبانو د په رسميت پېژندلو لپاره لابي کړې، خو د امريکا د بندیزونو له وېرې يې د طالبانو د ملاتړ تورونه ردکړي.
له پاکستان سره د افغانستان په قضیه کې د سيمې دوه نور لوی قدرتونه ( چین او روسیه) همغږي ښکاري، خو د پاکستان لوی حریف هندوستان بيا په دې قضیه کې له امريکا متحده ايالاتو سره د همغږۍ خبر ورکړی.