تاند(پنجشنبه، د میزان ۸) په یوه څېړنه کې، چې نړیوال بانک د افغانستان د نړیوالو مرستندویانو لپاره کړې، ښودل شوې چې د افغانستان له مرکزي بانک (د افغانستان بانک) څخه د کابل تر سقوط او د طالبانو تر واک ته رسېدا مخکې یو نیم ملیارد ډالره ایستل شوي او پر افغانیو بدل شوي وو.
دا راپور د روانې میاشتې په پیل کې نړیوال بانک او د پیسو نړیوال صندوق په دوو مخونو کې ترتیب کړی دی.
د نړیوال، مالي متخصصانو په دې پټ راپور کې راغلي چې د افغانستان بانک د پیسو کمښت مخکې تر دې پیل شوی و چې طالبان افغانستان ونیسي.
راپور د افغانستان بانک پر چارواکو د بانک د بحران د مخنیوي لپاره د هغوی پر اقداماتو انتقاد کړی او په ځانګړي ډول یې په دې نیوکه کړې چې بې ضرورته یې ډېر ډالر په بازار کې لیلام کړي او پیسې یې له پلازمېنې د ولایتونو څانګو ته انتقال کړي دي.
دا راپور په داسې وخت کې خپرېږي چې افغانستان اوس د نغدو پیسو د کموالي له سخت بحران سره مخامخ دی او د خوړو او سونګ موادو بیې په لوړېدو دي.