تاند:( چارشنبه، د ميزان اوومه) د آسیا زړه ټولنې د دوحې انسټيټوټ د شخړو او بشردوستانه مطالعاتو مرکز په مرسته، پرون د ۲ مسیر د خبرو دیارلسمه لړۍ د يو شمېر هغو مطرحو کارپوهانو او ډيپلوماټانو په ګډون ترسره کړه، چې په افغانستان کې يې ماموريت کړی، يا يې وضعيت له اوږدې مودې راهيسې څاری.
د دغه انلاين بحث ګډونوالو د افغانستان پیښ شوي وضعیت په اړه د بحث تر څنګ وویل: شونې ده چې په هیواد کې جنګ او نښتې ختمې شوې وي؛ مګر په افغانستان کې د سولې او ثبات تینګښت، د سیاسي او ټولنیزو ګروپونو د مشارکت او نړیوالو ټولنې د تعامل او همکارۍ له لارې ترلاسه کیدای شي.
د سیمې او نړۍ دغو ډيپلوماټانو او کارپوهانو تینګار وکړ چې په افغانستان کې د نوي رژیم په اړه د سیمې هیوادونو او د لویدیزو هیوادونو لیدلورو ترمنځ یو روښانه درز لیدل کیږي چې دا درز ورځ تر بلې ډیریږي.
دوی غوښتنه کړې، چې د ملګرو ملتونو سازمان په واسطه څو اړخیزې هڅې د نړۍ د همغږۍ په موخه ترسره شي.
ګډونوالو وویل چې افغانستان کې د طالبانو رهبرۍ لاندې دولت برخلیک روښانه نه ده، مګر طالبان او نړیواله ټولنه مسوولیت لري تر څو افغانستان کې د پراخ بشري او اقتصادي ناورین مخه ونیسي.
ويل شوي چې په دغه بحث کې د افغانستان لپاره د ملګرو ملتونو د سرمنشي د پخواني مشهور استازي لخدر ابراهیمي ترڅنګ مشهور څېړونکي بارنټ روبین، د افغانستان د بهرنیو چارو وزارت پخواني سياسي مرستيال جاويد لودين او یو شمېر نورو مشهورو ډیپلوماټانو او افغانستان پوهانو ګډون کړی و.