تاند:( چارشنبه، د ميزان اوومه) د افغانستان له یوه بل ختيځ ښار ( اسعد اباد) څخه تازه راپورونه وايي، چې هلته نن سهار د کونړ ولايت د کانونو د رئيس مارشال پر موټر چاودنه شوې.
د کونړ د اطلاعاتو او فرهنګ رئيس رسنيو ته ويلي، چې دغه چاودنه نن سهار د کونړ په مرکز اسعداباد ښار کې شوې.
سرچينې د چاودنې سیمه( شګۍ) ښودلې او ويلي، چې د رئيس په ګډون ۳ تنه پکې ټپيان دي.
روغتيايي مسوولينو بيا د ټپیانو شمېر ۵ تنه ښودلی، خو د وضعيت او هویت په اړه يې څه نه دي ويلي.
د چاودنې مسوولیت چا په غاړه نه دی اخیستی، خو په کونړ ولایت کې له څو ورځو راهيسې د داعش ډلې د فعالیتونو د بيا پيل خبرونه ورکړل شوي.
له دې سره نن طالبانو په کابل او ننګرهار ولايتونو کې د يادې ډلې پر ضد د عملياتو د پيل خبر ورکړی.
د يادونې وړ ده، چې له څه مودې راهيسې په جلال اباد کې هم د طالبانو پر ضد د داعش ډلې د چاودنې او بريدونو خبرونه ورکړل شوي.