پاکستاني چارواکي وايي چې که د طالبانو حکومت نړیوال په رسمیت ونه پېژني، په افغانستان کې د طالبانو د تخنیکي او مالي ملاتړ او د متخصصانو په ورلیږلو کې به له ستونزو سره مخامخ شي.
پاکستاني رسنیو نن / چهارشنبې وویل، د دغه هیواد د اقتصاد وزیر عمر ایوب خان په مشرۍ پرون په یوه غونډه کې د افغانستان د نوي حکومت د ظرفیتونو د لوړولو او د تخنیکي متخصصانو د ورلېږلو په شمول په بېلابېلو برخو کې د ملاتړ پر انتخابونو غور وشو.
د ډان ورځپاڼې د راپور له مخې، دا غونډه پهداسې حال کې جوړه شوه چې افغانستان د خوراکي موادو د کموالي له بحران سره مخامخ دی او تر دې هم مهمه دا ده چې د طالبانو حکومت نړیوالو په رسمیت نه دی پېزندلی چې له کبله یې له افغانستان سره د پاکستان ملاتړ ته خنډونه پېښېږي.
په غونډه کې د پاکستان د خوړو د ملي امنیت او تحقیقاتو وزیر سیدفخر امام ، د ملي امنیت سلاکار موید یوسف، د مرکزي بانک (سټیټ بانک) ريیس ډاکتر رضا باقر، د اوبو او انرژۍ د ادارې رييس متقاعد جنرال مزمل حسین او ګڼو نورو جګپوړو چارواکو له افغانستان سره پر اقتصادي همکارۍ خبرې وکړې.
ډان ورځپاڼه راپور ورکوي چې د غونډې برخوالو ومنله چې له افغانستانه د امریکايي پوځیانو له وتلو وروسته له دې هیواد سره هر راز مرستې له جدي خنډونو سره مخامخ شوې دي.
د ځینو راپورونو له مخې، پاکستاني چارواکو دا هم ویلي چې د افغانستان لپاره د یوې اردو د جوړولو لپاره به له طالبانو سره مرسته وکړي او پاکستاني پوځیان به افغان ځواکونه وروزي.