تاند (شنبه، د میزان ۳) د افغانستان او بنګله دېش له ۱۹ کلنو کم عمرو ملي لوبډلو ترمنځ یواځینۍ فرسټ کلاس یا څلور ورځینۍ لوبه افغان لوبډلې وګټله.
دغه لوبه د بنګله دېش په کوربتوب ترسره شوه چې کوربه لوبډلې د پچې په ګټلو سره د توپ وهنې پرېکړه وکړه.
بنګله دېش لوبډلې په لومړنۍ پاڼۍ کې د ټولو لوبغاړو په سوځېدو ۱۶۲ منډې یې جوړې کړې.
افغان لوبډلې په خپله لومړۍ پاڼۍ کې د ټولو لوبغاړو په سوځېدو ۲۸۱ منډې وکړې. بلال سعیدي ۱۱۴، کامران هوټک په ۶۶ او فیصل خان ۳۹ منډې وکړې.
بنګله دېش په خپله دویمه پاڼۍ کې د ټولو لوبغاړو په سوځېدو ۲۲۸ منډې وکړې، چې په دې سره افغان لوبډلې ته د ۱۱۰ منډو هدف وټاکه.
افغان لوبډلې د ۱۱۰ منډو هدف د ۷ لوبغاړو په سوځېدو پوره او بنګله دېش ته یې په ۳ ویکټو ماتې ورکړه.
یو ځل بیا بلال سعیدي ښه توپ وهنه وکړه او ۵۴ منډې یې وکړې.