تاند(جمعه، د میزان ۳) ملا نورالدین ترابي، چې د طالبانو د تحریک له بنسټګرو څخه دی، وايي بیا به د لاس پرې کولو او اعدامونو په شان سختې جزاوې پیل کړي.

ملانورالدین ترابي، چې د طالبانو په تېر حکومت کې د عدلیې او یوه موده د امربالمعروف وزیر و، له اسوشیتید پریس خبري اژانس سره په مرکه کې د طالبانو له لوري په تېره دوره کې پر اعدامونو د نړیوالو او افغانانو اعتراضونه بې ځایه وبلل.

طالبانو له ۱۹۹۶ څخه تر ۲۰۰۱ پورې عموماً په غازي لوبغالي کې د زرګونو خلکو په مخکې اعدامونه کول.

ترابي، چې د طالبانو په منځ کې په بې رحمۍ مشهور و، اسوشیتید پریس ته وویل«هر چا په لوبغالي کې زموږ له لوري په سزا ورکولو اعتراض کاوه خو موږ هیڅکله د نورو د قوانینو او سزاوو په اړه څه ونه ویل. نور هم باید زموږ د قوانینو په اړه څه ونه وايي. موږ به د اسلام په لاره ځو او د قرآن پر اساس به قوانین جوړوو.»

له کله چې طالبان واک ته رسېدلي، تراوسه پورې یې څوک اعدام کړي نه دي او نه یې تراوسه د کوم غله لاس پرې کړی دی.

ډېر خلک وايي چې طالبان باید لومړی خلکو ته د ژوند کولو شرایط برابر کړي، بې روزګارو ته کار پیدا کړي او هغوی چې کار لري معاش ورکړي؛ هاله دې اسلامي قوانین تطبیق کړي.

که څه هم په یوه سترګه نابینا او په پښه ګوډ ترابي په عکس کې مشر ښکاري خو اسوشیتید پریس ته یې ویلي چې ۶۰ کلن دی.

دی وايي چې په غلا د تورنو کسانو د لاس پرې کول د امنیت د ټینګښت لپاره ضروري دي.

ترابي وايي چې د طالبانو کابینه اوس په دې غور کوي چې ایا په عام محضر کې سزا تطبیق شي او که له خلکو په پټه.

تراوسه پورې د طالبانو حکومت هیڅ هیواد په رسمیت نه دی پېژندلی. که څه هم د ښځو د حقونو او ټولشموله حکومت په شان غوښتنې د طالبانو د حکومت د نه رسمیت پېژندلو دلایل بلل کېږي خو تر دې هم د طالبانو د تېرې دورې اقداماتو د نړیوالو له لوري د دوی د حکومت په نه رسمیت پېژندلو کې ډېر رول لرلی دی.