تاند (پنجشنبه، د سنبلې ۲۵) په افغانستان کې د ملګروملتو د سرمنشي ځانګړې استازې او د یوناما یا د ملګروملتو د مرستندوی ماموریت دفتر مشرې دیبرا لاینز د افغانستان د کورنیو چارو له نوي وزیر سراج الدین حقاني سره ولیدل.
رویټرز خبري اژانس وايي، سراج الدین حقاني، چې د نړۍ تر ټولو مطلوب کس و او ملیونونه ډالر یې پر سر جایزه ټاکل شوې، اوس د طالبانو د حکومت د هغې برخې غړی هم دی چې د بشري ناورین د مخنیوي هلې ځلې کوي.
د طالبانو یوه ویندوی سُهیل شاهین نن پر خپله ټویټرپاڼه کښلي چې د مېرمن لاینز او ښاغلي حقاني د خبرو تمرکز پر بشري مرستو و.
په دې کتنه کې حقاني ټینګار وکړ چې د ملګروملتو کارکوونکي له هیڅ راز خنډه پرته کار ته دوام ورکولی او افغانانو ته مرستې رسولی شي.
د رویټرز د راپور له مخې، افغانستان له وړاندې لا له سختې بېوزلۍ او بدې وچکالۍ سره مخامخ و خو له تېرې میاشتې را په دې خوا چې طالبانو واک ترلاسه کړی، د دغه هیواد وضعیت خورا خراب شوی دی ځکه چې د مرستو رسولو چارې ټکنۍ شوي، لسګونه زره حکومتي چارواکي، مامورین او مرستندویان له افغانستانه وتلي او اقتصاد تر ډېره سقوط کړی دی.
روانه اوونۍ د ملګروملتو سرمنشي انتونیو ګوتریش په جینیوا کې د افغانستان د مرستو نړیوال کنفرانس ته وویل چې ښايي افغانستان د خپل تاریخ تر ټولو له خطرناکو شېبو سره مخامخ وي.
په ۲۰۰۹ کال طالبانو د کابل پر یوه مېلمستون په حمله کې د ملګروملتو ۵ کارکوونکي ووژل.
د افغانستان حکومت دا برید د حقاني شبکې کار وباله.
سراج الدین حقاني لا هم د امریکا په تور لیست کې دی خو طالبان وايي چې امریکا د ۲۰۲۰ کال د فبرورۍ د ۲۹ نېټې په موافقه کې ژمنه کړې وه چې د طالبانو ټول مشران به له تورو لیستونو باسي.
له سراج الدین حقاني سره د مېرمن لاینز د کتنې په عکس کې ښاغلی حقاني نه ښکاري.