تاند(پنجشنبه، د سنبلې ۱۱) داسې ښکاري چې د اتیایمې او نوي یمې لسیزې په شان اسلام اباد یو وار بیا د افغانستان په اړه د سلامشورو پر مرکز بدلېږي.
د هالنډ د بهرنیو چارو وزیره پاکستان ته تللې چې په کابل کې د پاتې هالنډي اتباعو د وضعیت د تعقیبولو او د افغانستان د حالاتو په اړه له پاکستاني چارواکو سره خبرې وکړي.
د پاکستان دولتي رسنۍ وايي، مېرمن سیګرید کاګ قطر، ترکیې او پاکستان ته خپل سیمه ییز سفر پیل کړی او ټاکل شوې ده چې د دغو هیوادونو له چارواکو سره د افغانستان په اړه وږغېږي.
د پاکستان د باندنیو چارو وزارت هم په یوه اعلامیه کې ویلي چې د دغه هیواد د بهرنیو چارو وزیر شاه محمود قریشي له مېرمن کاګ سره په اسلام اباد کې وکتل.
د پاکستان د باندنیو چارو وزارت د خبرپاڼې له مخې، پاکستان له افغانستانه د هالنډي دیپلوماتانو او د دغه هیواد د نورو ادارو د پرسونل په ایستلو کې له هالنډ سره مرسته کوي.
اغلې کاګ به له پاکستاني مشرانو سره د هغو افغانانو د ایستلو په اړه هم خبرې وکړي چې له هالنډیانو سره یې کار کړی دی.
د پاکستان د بهرنیو چارو وزیر پرون د کاناډا له بهرنیو چارووزیر سره هم د افغانستان د حالاتو او له افغانستانه د هغو خلکو د ایستلو په اړه د پاکستان د مرستې په اړه خبرې وکړې چې په افغانستان کې پاتې دي.
په همدې حال کې د بریتانیا د بهرنیو چارو وزیر ډومنیک راب هم غواړي چې د افغانستان په اړه له پاکستاني چارواکو سره د خبرو لپاره اسلام اباد ته لاړ شي.