دا برید تېر مازیګر مهال وشو او پکې لسګونه ملکي وګړو ته مرګ ژوبله واوښته.
محمد نبي عیسی خېل پخپله فیسبوک پاڼه لیکلي دي:《 لویه خدایه! یا رحمان یا رحیمه! دې ملت د دردونو انتهاوې هم په خپلو دردېدلو سترگو ولیدې او د ژوند ټولې ترخې او ستر مصیبتونه هم تجربه کړل.》
نبي د دعا په ډول زیاته کړې، چې نور دې دا غمځپلی، دردېدلی، بېچاره او بې ځواکه هېوادوال له افتونو او مصیبتونو څخه وساتل شي.
دغه راز د ملي لوبډلې بل لوبغاړي رحمن الله ګربز هم د یاد برید په اړه په خپل غبرګون کې د کابل هوایي ډگر کې خونړی برید لوی ظلم او خیانت بللی.
نوموړي زیاته کړې: 《 له زړه یې ودردولم او ښه سخت یې ودردولم!. خدای تعالی دې ددې ستر وحشت عاملین پخپل غضب گرفتار کړي. یا لویه خدایه! ډیر وغمېدو! ډیر وکړیدو! نور مونږ هم د لږ آرام او سوکاله ژوند حقدار وگڼه! آمین》.
د یادونې ده چې د کابل پر هوایي ډګر د تیر ماښام دوو چاودنو له امله د وژل شویو شمیر تر ۹۰ تنو اوښتی او د وروستیو معلوماتو له مخې تر ۳۰۰ نور ډیر پکې ټپیان شوي دي.
په وژل شویو کې د۱۳ تنه یوازې امریکایي سرتیري دي.
د یاد برید مسوولیت داعش ډلې پر غاړه اخیستی دی.