تاند (دوشنبه، د اسد۲۵) د امریکا د متحدو ایالتونو لوی درستیز جنرال مارک میلي د یکشنبې په ورځ، چې وسله والو طالبانو د ارګ په شمول کابل ولایت ونیوه، سناتورانو ته په وینا کې وویل، د القاعده په شان تروریستي ډلې ممکن تر هغه څه چې دوه کاله پخوا یې دفاعي چارواکو اټکل کاوه، ژر په افغانستان کې سر راپورته کړي.
جنرال میلي د خپلې ادعا د ثبوت لپاره په افغانستان کې د طالبانو وروستي چټک پرمختګونه وبلل.
د سي این این تلویزیون د راپور له مخې، د امریکا لوی درستیز د طالبانو وروستیو چټکو پرمختګونو ته په اشارې وویل، د افغانستان وروستی وضعیت د یوه ستر تروریستي ګواښ سبب کېدای شي.
په همدې حال کې د امریکا د کانګریس یو شمېر غړیو د افغانستان د حکومت د پرزېدو په خاطر پر ولسمشر جو بایډن توندې نیوکې وکړې.
د نیوجرسي جمهوریپال استازي باب هوګین وویل چې بایډن طالبان پرېښودل چې افغانستان ونیسي. د جمهوریپال ګوند بل سناتوراندي کیم هم پر بایډن ورته نیوکه وکړه.
د کانګریس په غونډه کې د اقلیت مشر کیفین مک کارټي د کابل وضعیت تر ټولو بده ممکنه نتیجه وبلله.
ده زیاته کړه«دا د ویتنام یاد تازه کوي چې هیلي کوپترونه اوس له سفارته الوزي او یا هلته کښېني.»
په غونډه کې د امریکا دفاع وزیر لویډ اسټن وویل، په داسې حال کې چې پینتاګون د یو شمېر بالقوه نتیجو پلان جوړاوه، د طالبانو په وړاندې د افغان ځواکونو نه مقاومت خورا نهیلوونکی و.
«دوی په تېرو ۲۰ کلونو کې د ايتلافي ځواکونو له لوري روزل شوي وو، مدرن هوايي ځواک یې درلود، ښې وسلې او وسایل یې لرل او دا ټول د دوی امتیازونه وو. خو څوک چا ته په زور اراده او مشرتوب نه شي ورکولی او دا واقعاً په اوسنیو شرایطو کې کم و.»
خپله مو ورته پلاس ورکړ او اوس داخبرې کوئ بیا لاړ شئ او په زرهاو افغانان ووژنئ او خپلې وسلې پرې ټیسټ کړئ. افغانان او د هغوی خاوره ستاسو لپاره د یو تمریناتي میدان مثال لري.