تاند (شنبه د اسد ۲۳مه) ولسمشر محمد اشرف غني وايي چې د بېځایه شویو کورنیو د ځای پر ځای کولو لپاره دې کمپ جوړ او د جومات، برېښنا او نورو اسانتیاوو په ګډون دې ټول امکانات ورته برابر شي.
ښاغلي غني نن په ارګ کې د وروستیو پیښو له امله د بیځایه شویو کورنیو سره د مرستې په تړاو غونډه را بللې وه. په غونډه کې کابل ښاروالۍ ته امر شوی چې په بیړه د ملي دسترخوان پروژه تازه بې ځایه شویو ته تطبیق کړي. همدارنګه هغه ویلي چې لس زره کسانو ته دې کاري برنامه ترتیب شي.
د ارګ له لوري په خپره شوې خبرپاڼه کې راغلي، ولسمشر ژمنه کړې چې دی به له خپلې شخصي پانګې هم څلویښت میلیونه افغانۍ له بې ځایه شویو سره مرسته وکړي.
د ملګرو ملتونو د بشري مرستو د همغږۍ دفتر یا (اوچا) وايي، په افغانستان کې د جګړو د زیاتېدو له امله د جولای د میاشتې له لومړۍ نېټې څخه د اګست تر ۱۳مې پورې ۱۳۵۰۰ کورنۍ کابل ته کډوالې شوي دي.
اوچا نن شنبه/ د اسد۲۳مه/ په یوه بیان کې ویلي چې یادې کورنۍ تر ډېره د افغانستان له شمال، جنوب لویدیځ او جنوب ختیځو ولایتونو څخه را کډوالې شوې دي.
د بیان له مخې، یو شمېر بې ځایه شوې کورنۍ په کرایې کورنو او ځینې له خپلو دوستانو سره اوسي او یو زیات شمیر نورو د کابل ښار په ځینو نورو سیمې کې اړولي دي.
د اوچا د معلوماتو په اساس څه باندې ۲۰ خیره بنسټونو کابل ته د راکډوالو شوو کورنیو سروې پيل کړې ده او هڅه کوي چې بېځایه شویو کورنیو ته د اوسېدو ځای، خوراکي توکي، درمل، د څښاک پاکې اوبه او ځینې نورې اسانتیاوې برابرې کړي.
دغه اداره وايي، یادو خیریه بنسټونو په تیرو ۱۳ ورځو کې له ۶۶۰۰ کورنیو سره د خوراکي توکو، نغدو پیسو، روغتیا او په ځینو نورو برخو کې لازمې مرستې کړي دي.
په افغانستان کې د جګړو له زیاتېدو سره ګڼ شمېر کورنۍ د خپل سر د خوندیتوب لپاره کابل ته راغلي دي.
د افغان چارواکو په وینا په تیرو څه باندې دوو میاشتو کې په افغانستان کې د جګړو له امله څه باندې ۶۰زره کورنۍ بېځایه شوي دي.