تاند (چهارشنبه د اسد ۲۰مه) وروسته تر هغه چې د پاکستان د بهرنیو چارو وزیر شا محمود قریشي وویل چې د افغانستان حکومت دې د خپلو ناکامیو پړه پر دوی نه وراچوي، افغان دولت یې په غبرګون کې ویلي چې پاکستان د طالبانو په ګډون د هغو ترهګرو لپاره خوندي پټنځای دی چې په افغانستان کې جګړه پر مخ بیایي.

د افغانستان د بهرنیو چارو وزارت نن چهارشنبه/ د اسد ۲۰مه/ د یوه بیان په خپرولو سره ویلي چې په تېرو دوو لسیزو کې له پاکستان څخه د افغان حکومت مکرره غوښتنه دا وه چې دغه هېواد باید د طالبانو او نورو ترهګرو ډلو پر وړاندې جدي او ملموس اقدامات وکړي خو، زیاتوي چې پاکستان تر اوسه پورې انکار کوي.

په بیان کې د قریشي هغو څرګندونو ته په اشارې چې افغان ځواکونه د جګړې اراده نه لري راغلي، افغان ځواکونه شپه او ورځ په پیاوړې عزم او نه ماتېدونکې ارادې د طالبانو په ګډون له نورو ترهګرو ډلو سره په جګړه بوخت دي.

تر دې مخکې د پاکستان د بهرنیو چارو وزیر شاه محمود قریشي له وسله والو طالبانو سره د افغان ځواکونو پر مبارزه د نیوکې تر څنګ ویلي و چې نړیوال باید له دغې ډلې سره د افغان ځواکونو مبارزې ته پاملرنه وکړي.