تاند(یکشنبه، د اسد ۱۳) راپورونه وايي چې وسله وال طالبان د کندوز ښار ځینو سیمو ته ننوتي او له امنیتي ځواکونو سره په خورو ورو نښتو بوخت دي.
د لومړنیو راپورونو له مخې، طالبان د کندوز د شرکت باغ، خان اباد بندر سیمو ته داخل شوي دي خو تراوسه پورې یې په ښار کې مهمې دولتي ودانۍ نیولې نه دي.
د دغه ولایت چارواکي خلکو ته ډاډ ورکوي چې امنیت به یې وساتي.
راپورونه وايي چې د ښار په ځینو برخو کې خورې – ورې نښتې روانې دي او شېبه په شېبه یې شدت زیاتېږي خو مهمې دولتي ودانۍ لکه د ولایت مقام، امنیه قومانداني، د ملي امنیت ریاست، هوايي ډګر، ښاروالي، او نورې دولتي ادارې د امنیتي ځواکونو په کنټرول کې دي.
کندوز تر دې وړاندې د لنډ وخت لپاره دوه ځلې وسله والو طالبانو نیولی و.
په کندوز ښار کې له نښتو سره هممهاله د سرپل ولایت د مرکز د امنیتي وضعیت د خرابېدو راپورونه هم ورکول کېږي. په دغه ښار کې ځینې خلک وايي چې طالبان د ښار ځینو سیمو ته ننوتي او د خلکو په کورونو کې پټ شوي دي.
پرون طالبان وتوانېدل چې د جوزجان ولایت مرکز شبرغان ونیسي.
د طالبانو لاس ته د دغه ښار له لوطدو وروسته امریکايي الوتکې هلته د طالبانو د راغوڼډېدو پر ځای او وسلو بمباري کړې ده. د افغانستان دفاع وزارت وايي، د امریکا بي ۵۲ الوتکو دا بمباري د جوزجان ولایت په مرکز شبرغان کې پر طالبانو بمباري کړې ده.
د دفاع وزارت ویندوی فواد امان پر خپله ټویټرپاڼه کښلي چې دا برید پرون ماښام شپږ نیمې بجې وشو او طالبانو ته یې درنه مرګ ژوبله اړولې ده.
د فواد امان په وینا د امریکايي الوتکې په بمبارۍ کې د طالبانو د ډېر شمېر وسلو او مهماتو ترڅنګ د هغو تر سلو ډېرې نقلیه وسیلې هم ویجاړې شوې دي.