تاند (چهارشنبه د اسد ۱۳) د افغانستان حکومت په دې هېواد کې د روان وضعیت په هکله د ملګرو ملتونو د امنیت شورا د ځانګړې غونډې د جوړېدو غوښتنه وکړه.
د د افغانستان د بهرنیو چارو وزارت وايي چې د بهرنیو چارو وزیر محمد حنیف اتمر له خپل هندي سیال جي شینکر سره د افغانستان پر روان وضعیت ټلیفوني خبرې کړي.
د بهرنیو چارو وزارت د اعلامیې له مخې ښاغلي اتمر له ښاغلي شنکر چې دمګړۍ د امنیت شورا دوره يي مشري پر غاړه لري وغوښتل چې د روان وضعیت په هکله ددغه شورا ځانګړې غونډه راوبولي او د افغانستان په هکله وروستي مسایل پکې مطرح کړي.
اعلامیه زیاتوي، « د افغانستان اسلامي جمهوریت د بهرنیو چارو وزیر محمد حنیف اتمر، د هند بهرنیو چارو له وزیر شاغلي ایس جی شنکر سره د حملو د زیاتوالي، په افغانستان کې د طالبانو او بهرنیو ترهګرو ډلو لخوا د بشري حقونو پراخو سرغړونو او د افغانستان په اړه د ملګرو ملتونو د امنیت شورا ځانګړې ناستې د جوړولو په اړه تليفوني خبرې وکړې. هند دا مهال د ملګرو ملتونو د امنیت شورا دوره یي مشري کوي.»
حنیف اتمر زیاته کړې چې د طالبانو له لوري د تاوتریخوالي ډېرېدل، ملکي مرګ ژوبله او د عامه تاسیساتو ورانول هغه مسایل دي چې امنیت شورا باید ورباندې بحث وکړي.
د افغانستان د بهرنیو چارو وزیر پرون سه شنبه/ د اسد ۱۳مه/ د ګاونډیو او سیمه ییزو سفارتونو له استازو سره په لیدنه کې وویل چې په تېرو څو میاشتو کې د طالبانو له لوري په خونړۍ جګړه کې درې زره ملکيان وژل شوي، درې سوه زره کسان د خپلو سیمو پرېښودو ته اړ شوي او اوسمهال اتلس میلیونه وګړي په تر ټولو بد بشري وضعیت کې ژوند تېروي.
د افغانستان د بهرنیو چارو وزارت وايي چې په دې ټلیفوني مکالمه کې د هند د بهرنیو چارو وزیر هم وویل چې دوی ددغه غونډې د جوړولو لپاره هڅه کوي او په افغانستان کې وروستی تاوتریخوالی په کلکو ټکو غندي.